بعد ما يسار الكافيار متاع لندن فشل في قطع الطريق على المرشح المسلم لرئاسة بلدية لندن، الجبهة الشعبية متاع بريطانيا تعمل ندوة صحفية وتحذر من "أسلمة المملكة" وتطالب بإنشاء لجنة باش تراقب التعيينات في بلدية لندن لأنو شرفاء الداخلية البريطانية حذروها من "أخونة" مدينة الضباب.
أما محسن مرزوق متاع بريطانيا فإنو دعا لمجلس بلدي موازي وقال انو العمدة الجديد من أصحاب الدماء السوداء ويلزم يثبت انو موش خطر على النمط المجتمعي البريطاني وإلا يلزمو يرجع لباكستان…
أما الشيخ راشد متاع لندن فإنو عبر على السعادة متاعو بالعمدة الجديد وقال انو يفكرو بشبابو وانو بوه كان صاحبو واستدعاه لطهورو وشرب معاه ما تيسر من الجعة الحلال متاع بوصبيع اللندني،
وفيما يخص "سي الباجي" متاع لندن فإنو قال الحكاية هاذي ما تهموش برشه وانو باش يستدعى العمدة الجديد على كأس حليب من الناقة كاميليا بحذا خوه الباجي التونسي، وفي صورة انو العمدة الجديد رفض الدعوة فإنو باش يبعثو يرهز هو والملكة اليزابيث…وماهي إلا مرا.
واعربت النساء الديمقراطيات متاع بريطانيا على مخاوفهم من العمدة الجديد اللي يحفظ جزء عم ومرتو ما تلبسش بروتال وما شافوها حتى مرة في زاوية سيدي كالفن ولا في زاوية للا ديانا، وشكك سمير بالطيب اللندني في حداثة العمدة الجديد وقال انو بعض مناضلي النمط شافوه خارج من الجامع الكبير متاع لندن، والأخطر انو ثمة شكون استدعاه على حارة بيرة لكنو أعتذر بطريقة مشبوهة.
وأعلنت النقابات الأمنية متاع لندن انها باش تدخل في إضراب مفتوح اذا العمدة الجديد حاول يعمل أمن موازي وإلا حاول يهدد مصالح "شرفاء البلدية" ومصالح رجل البر والإحسان سي كمال الأنغلوساكسوني حامي النمط وما جاوره بالتوقيت المحلي متاع أزلام لندن.
وأعلن تنظيم داعش متاع لندن انو باش يفجر مقر البلدية وممكن يفجر قصر الملكة اليزابيث اذا ثبت انو العمدة الجديد من الروافض وإلا من الطائفة القديانية، واذا ثبت انو من اهل السنة والجماعة فانو مطالب على الأقل بالدعوة لاستفتاء من اجل خلع الملكة وحطان ولدها الأمير تشارلز في بقعتها لأنو ثبت عندهم في الانجيل المنحول متاع سيدنا حوس انو ما أفلح بريطانيون ولوا أمرهم امرأة…