(*)الدينار التونسي قاعد طايح عندو تلاثين سنا باختلاف السياسات والمسؤولين ... صحوًا كانت الحالة او مطرًا.
(*) لكن السرعة متاع التدهور في المدة الاخيرة هي اللي موش معقولة على خاطر :
• في تونس بصيفة خاصة على قد ما يطيح الدينار على قد ما العجز التجاري يزيد والاحتياطي مالعملة الصعبة ينقص وهذا يلزمو برشة حديث لكن تنجموا تلاحظوه بالارقام.
• التدهور متاع الدينار يزيد في تدهور قدرة البيع والشرا متاع التوانسة ويزيد يعلّي في حجم الديون اللي يلزمنا نرجعوها (لكن نحسبوها بالدينار باش نشوفو استدامة الدين)
(*) نجيوْ نشوفو نلقاوْ اللي كل الاسباب والعوامل اللي حصلت في مختلف الدول واللي حكات علاها النظريات اللي نعرفوها عل الأقل الْكلها تجمّعت:
ايّ سيدك:
(1) بلاد اقتصاديا صغيرة وما تبتكر في صناعة حتى شيء في الاسواق العالمية. قليل باش تلقى شكون يفلّت في الدولار ويشري الدينار
(2) بلاد في مرحلة انتقالية وزادت الهشاشة متاعها من جرّة انخفاض الانتاج و شلل اركانها (الفسفاط والسياحة وبعض الصناعات التحويلية) ومع ذلك نزيدو نحررو الدينار. وزيد المحافظ السابق جمعتين قبل ما يبدلوه قرر اللي البنوك تنجم تخلي عندها العملة الصعبة وما ترجعهاش للبنك المركزي، موش كيما قبل. يولّيوْ البنوك عندهم امكانية الاحتكار والضغط على الدينار باش يتلزّ البنك المرزكي ويضخ العملة الصعبة النادرة في سوق الصرف، فماش ما يستقر الدينار..ويزيد المحافظ يفجع الناس ويشد بلاسط الحكومة ويقلّهم راو الشهاري فيها مشكل وراوْ الدينار ما عنا ما نعملولو...باش اللي عندو دينار يخبيه واللي عندو دولار ما يجيوش لتونس...واللي عندو راسمال يقلّك اش لزّني.
(3) ارتفاع الدولار على اليورو هو ناتج من سياسة نقدية متاع الخزانة الامركية (ما عليناش فيها) والبنك المركزي الاروبي (ما عليناش فيه). مفاده انو الدينار يطيح بالنسبة للدولار ولكن يزيد يطيح بالنسبة لليورو على خاطر البنك المركزي يضخ فيه في سوق الصرف ويرجع بيه (وبالدولار) في الديون ويخلص بيه في التوريد ويعطي منو في الارباح متا غير المقيمين..
(4) السوق السوداء متاع العملة اللي عندها برشة اسباب لكن جزء منها ناتج من سياسة الصرف في حد ذاتها وعدم اهتمام السلط بالموضوع.
(5) في غياب سياسة مديونية واضحة،نستسهلو لحكاية ونوليوْ ندّاينو باش نحلّو مشاكل ظرفية. القرض هذاك يولي ما يخلقش الثروة ونرجعو ل (1) و (2) و (3) و (4).
(6) في غياب تنسيق بين الحكومة والبنك المركزي وتداخل الادوار تولي الحكاية متاع تبادل التهم بصفة غير مباشرة لاتنفع في استقرار الدينار ولا البلاد ولا العباد.
انا نتصور اللي تدهور الدينار بالصيفة هذي والاستسلام ما يزيد كان يصعب الوضع. موش معقول باش ما يتمش الاهتمام بالنقاط (2) حتاش (6) باش ينقصو مالمشكلة ويبعثوا رسالة ايجابية للناس وللمستثمرين وفك علينا ملإصلاحات والمشاريع متاع القوانين الِّي شطرها غير دستوري وتضيع ياسر وقت.