الناس الي عايشين في المنطقة و محرومين من ابسط متطلبات العيش الكريم والي عندهم اكبر نسبة بطالة و ما عندهمش بنية تحتية و لا وسائل ترفيه من وقتاش و هوما صابرين و من وقتاش و هوما يطالبوا بتغيير واقعهم …
وقت الي تعيش في بلاد ثلثها اطرش وثلثها كيف الأطرش في الزفة يميح مع الارياح و الثلث لآخر يلعب فيها حمرة كحلة و قاعد على قلوبنا من غير ما تكون عندو حلول .. يصير فينا اكثر من هذا .
و الناس الي تشعل في النار و ناوية باش يرجع يشدها أمني .. من البوليس او من الحرس ... يلزمو يقتنع انو يحلم ... العرف الكبير لن يسمح لكم بذلك.
نحن مقدمون على أزمات و مشاكل متعددة فلا تجعلوا الشعب يعتبركم أعداءه .. الم تفهموا الدرس ؟
قالّك " نبهوهم قبل .. هوما غالطين" ..
فقط كل واحد يسكر عينيه و يتصور روحو عايش في تطاوين و ولدو معتصم في الكامور على خاطر تسكرت الدنيا قداموا و ما عندوش ثقة وآمل ان الحكومة ( الي عندها شبهات فساد ) تنجم تلقى حلول ..
كل واحد يحط روحو في بلاسط ام والاّ بو ولدو ينجم في اي وقت يلتحق بداعش او يحرق ..
عوض إعطاء المواعض و الدروس و النصائح كل الناس يلزمها تتجند لإخراج البلاد من هذا المأزق و لإيجاد حلول اقتصادية و منوال تنموي جديد .
و الحكومة الغير قادرة على رفع التحدي ما تاخذش المسؤولية و الشعب الي ما يحنّش على بعضو و الشعب الي ما يتحسّش على موت شاب من بلادو .. لا يستحق ان يكون له وطن .
خواطر ...
كيف نشوف الي صاير في تطاوين نفهم الي الجهة لم تنعم بالتنمية لعقود و انها جهة مهمشة البطالة فيها بنسبة عالية و البنية التحتية شبه منعدمة .
لكن في نفس الوقت نحس بفرحة كبيرة على خاطر باقي مناطق الجمهورية الكل من شمالها الى الشمال الغربي الى الوسط الى المناطق الحدودية يعيشون في بحبوحة من العيش و ما طالبين شي : بطالة شبه منعدمة تنمية ، مشاريع ناجحة و طرق سيارة و و و … ربي يدوم عليكم هالخير و النعمة.
خلي مالا نتلهاوْ بتطاوين و بحول الله تونس تولي سويسرا متاع افريقيا …