شفت كيفاش فرحت و وجهك نور و هزيت صحتك وقت فقت باضحوكة بيان عقبة بن نافع و فهمت المؤامرات الاعلامية و تشويه المسارات و المجموعات الوظيفية و الارهاب المبرمج ؟
باهي ...نفس الشيء نطبقوه في الكبير باش تبدأ وضعيتنا في العنبر. اسمعني ...الثورات ربيع عبري ؟؟؟لااا ..شكون قال ..لكن ينجمو يتآمرو عليها و يهزوها لثنية أخرى ضد مطلوبها ..هكا و إلا لا ؟
عقبة و بوعياض و تطبيق الشريعة و موتوا بغيظكم و الأفكار السوداء الي تقتحم مظاهراتك و افكارك و يسيطرو على احساسك و تحاليك ..ينجمو يكونو بالضبط مثل جيش الاسلام و جند الشام و الحر و الفوسفور و الكلور و البراميل و هاذاكا حزب لات و هاذوكم رافضة و غيرها من الافكار الي يصنعوهالك في بلاصة أخرى ..هكا و إلا لا؟..ينجمو حسب رايي ..
آخر خبر اونلاين و غيره ينجمو يكونو في بلادك مثل سكاي نيوز و العربية و الجزيرة و سي ان ان في بلاد الناس و يزيفولك وعيك إلا لا ؟؟ ينجمو ..
امالا اش يلزم ؟؟..نردو بالنا في التحليل ..كي نردو بالنا في التحليل معناها قلنا بشار ديمقراطي ؟ ..لا طبعا ..آما زادة ردينا بالنا باش نعرفو الثورة من غير الثورة و المؤامرة من غير المؤامرة و نفككو المركب و نركبو المفكك …
شفت يا باهي قداش زاد نور وجهك و وليت تبارك الله عليك و انت تسمع بعقلك و تفكر بحسك النقدي ..وقتها لا يغشك لا مرزوق و لا بن تيشة و لا يخدعك لا بن سلمان و لا زايد و لا اردوغان و حتى نصرالله و خامنائي تبدا عارف وين تسمعهم و وين تناقشهم من غير سبان ..باهي ؟؟؟..راك تونسي يا مزيان …
ثمة جماعة باش يضحكو عليك و انت تسمع فيا و يقولولك يخلوض.. ما تسمعهمش هاذوكم يخدمو على ارواحهم يحبوها سباقة و جراية في بلاد الناس و ما تاكلش الشعير في بلادنا .