نحبو نعرفو قداش من "حداثي" "تقدمي" "ديمقراطي" مات على يدين نهضويين أو بتحريض مباشر من النهضويين في عهد بن علي وفي عهد بورقيبة وحتى بعد الثورة ؟ وفي المقابل قداش من نهضاوي تشرد وإلا تحرم من ابسط حقوقو الانسانية وإلا تعذب ومات على يدين"الحداثيين"،" التقدميين"، "الديمقراطيين" أو بتحريض مباشر منهم (في الإعلام والثقافة )؟
ونحبو نعرفو زادة جواب واضح على السؤال هذا: الثورة قامت على النهضة وإلا على عرف الباجي و"مناضلي النمط"(اللي اليسار يعتبرهم جزء من "العايلة الديمقراطية")، يعني الشعب الكريم ثار على خرافات النمط المجتمعي ( اللي ولات مجرد ديكور لنظام استبدادي، جهوي، زبوني،تابع، ومتخلف) وإلا الثورة قامت على الارادة الشعبية والانتخابات النزيهة والتشاركية في السلطة والديمقراطية اللي ما تستثني تى حد يقبل بالعمل القانوني وفي اطار الاعتراف المتبادل مع باقي الشركاء؟
يعني أكبر غلطة تعملها انو النهضة تبقى في وضعية الدفاع والتبرير ل"نخبة" متورطة بصورة مباشرة او غير مباشرة في كل جرائم المخلوع وفي الرجوع متاع "صناع صانع التغيير" لمركز السلطة في تونس.
واكبر من الغلطة هاذي انو النهضة عمرها ما طالبت الناس هاذومة بتحمل مسؤولياتهم السياسية والأخلاقية(واحيانا مسؤولياتهم القانونية) على المحرقة اللي تحطموا فيها الاف الناس(بين حرمان من العمل وفرز امني، وتهجير ممنهج وتعذيب وموت احيانا ).
برشه ناس ياش يقولوا انو النخبة "الحداثية" موش الكلها مسؤولة على جرائم المخلوع بن علي ...وهذا صحيح. لكن ما يلزمش تنساو إنو النخبة هاذي تعتبر النهضة مسؤولة على جرائم السلفيين والاغتيالات السياسي، يعني تعتبرها مسؤولة على جرائم طرف يكفر النهضة قبل غيرها.
ومن باب ألى انو النخبة"الحداثية" هاذي اللي راهنت قبل الثورة على بن علي وراهنت بعد الثورة على الباجي قايد السبسي تكون هي زاده مسؤولة سياسيا وأخلاقيا على جرائم المخلوع (في حق النهضاويين وغيرهم) ومن حق الشعب التونسي انو يحاسبها على علاقتها بالنظام السابق(نقصد علاقتها الصريحة وعلاقتها السرية والوظيفية خاصة في فترة المحرقة متاع النهضاويين ) .
مختصر الحكاية: اخر طرف ينجم يعطي دروس للناس في الحريات والحقوق والديمقراطية هوما النخب اللي راهنت على بن علي'وإلا خدمت معاه في السر وعلى هوامش النظام واستفادت منو ماديا ورمزيا، وآخر طرف ينجم يتهم النهضة بالإرهاب هوما الناس اللي نظروا لإرهاب الدولة وإلا سكتوا عليه وإلا استفادوا منو…ومستعدين يتعاملوا مع منبع الإرهاب وأعداء الانسانية (السعودية ولإمارات) باش يحافظوا على مصالحهم اللي ورثوها من عهد المخلوع ويمنعوا اي اعادة توزيع عادلة للسلطة والثروة في تونس.