أنا نعتبر نفسي ضحية من ضحايا نظام بن علي وعندي الشجاعة الكافية للاعتراف "رغم قوتي" بأني البكاء ليبكيتو مع اولى الجلسات العلنية لهيئة الحقيقة والكرامة مابكيتوش حياتي كاملة خاطر حير مواجع قمعتها برشا وندوب ماحبتش تبرى لليوم.
وبالرغم انو الفترة هذيكا تجاوزتها بصعوبة وخيرت انو ما نحكيش عليها بمنطق انو الجمرة ما يحسها كان ليعافس عليها..أما باش نشاركم جزء صغير من معاناة طفل ذنبو الوحيد انو بوه سجين سياسي.
انا "للأسف" مالصغار ليعشنا يتامة أيام بن علي وبابا حي.. حرمنا منو 15 سنة كاملة.. طفولتنا ماعشناهاش كي الصغار الكل.. تشد وأنا عمري 5 سنين واختي عمرها عامين وخويا أمي حبلة بيه.. وفي صغري الكل مانتذكر بابا كان في مشهد وحيد.. نتذكر كيفاش دخلوني عليه في مركز للايقاف عام 91 بولاية الكاف وكلو بالدم.. وقف وقعدت محمل ساقيه وبكى خاطر مانجمش يحملني بسبب شلل "وقتي" في ايديه الزوز بسبب التعذيب.
باش نتجاوز 15 سنة معاناة ومانيش باش نحكي على تفاصيل خايبة برشا عشتها اقلها محاولات طردي مالدراسة والحاقي بالسجن اكثر من مرة نكاية في الوالد (خنخلطوه على بوه كيما يقولو) ومحاولات تشريد العائلة الخ.. لكن باش نحكي "شوي" على فترة الاقامة الجبرية للوالد بعد خروجو مالسجن في 2005.
وقتها تقسمنا العايلة شطر في سوسة وشطر في معتمدية القصور بولاية الكاف بسبب حرمان الوالد من حقو الطبيعي في التنقل أو العمل وتسليط عقوبة "التصحاح" عليه..
ونتذكر كيفاش مرة رجعت مالفاك في سوسة وجيت نطل على الدار نلقى راجل ضعيف برشا وشاحب مفرش في القاعة ما عرفتوش ملول وبعد طلع بابا عامل وقتها اضراب جوع لمدة 33 يوم للمطالبة بحقو في العمل باش يعيش صغارو.. تصورو (يا جماعة بقداش كيلو النضال) شنوة الوجيعة والظلم والقهرة لحسيتها وقت شفت بابا هكاكا (والله دموعي هبطت كي تذكرتها).
زيدو تصورو كيفاش مرة مرضت مرضة خايبة في سوسة وكي منعو الوالد من زيارتي تحيل عليهم وطل عليا بالسرقة ياخي شدوه وحكمو عليه 15 يوم حبس في 2007 بتهمة خرق الاقامة الجبرية وزيارة ابنو بدون رخصة.. تصورو وقتها (يا جماعة بقداش كيلو النضال) القهرة ليعشتها والدموع ليبكيتها.
وقتها نتذكر روحي فديت وبعثت زوز برقيات لرئاسة الجمهورية باش "يحلو عن سمانا" ياخي في المرة الثانية وأنا نكتب البوسطة كلمو الحاكم وكرفتوني وهزوني نبحث.. تصورو (يا جماعة بقداش كيلو النضال) كيفاش حتى حقك في رفع المظلمة صادروهولك..
المهم اكتفي بهذا بالرغم انو القلب معبي والمظالم برشا وصدقا كم الوجيعة هذا ليعايش بيه حتى دارنا باش يعلمو بيه كي يقراو الستاتي هذا تو..
اما ليحبيت نقولو انو مع رجوع جدلية "التعويضات" راو جبر الضرر موش مزية راو قانون مصادق عليه برلمانيا مع فصول اخرى ضمن قانون العدالة الانتقالية وانو الضحايا موش باش يعوضوهم "معنويا او ماديا "من خزينة الدولة او باش يعوضولهم على نضالهم انما باش يعوضوهم على الضرر المادي والمعنوي المسلط عليهم من طرف نظام ين علي وبهبات أجنبية.
وانا مالناس الي اندافع على حق هؤلاء في التعويض خاطر حسيتها الوجيعة ونعرف اش معناها ظلم الدولة للافراد.. وبالرغم انو شي ماهو باش ينجم يعوض وجيعة ومعاناة المظلوم علقل عاونونا بسكاتكم واحترموا علقل دموع المقهورين والمقهورات.
وبالنسبة ليا ورغم دفاعي على مكسب التعويضات لأنو نعرف حاليا حالات تأسف وتبكي إلا انو ما حاشتيش بأي تعويض وماقدمتش اي دوسي لهيئة الحقيقة والكرامة "رغم انهم كلموني" لأنو بكل بساطة مانسيتش ومانيش مسامح لا دنيا ولا اخرة وزيد جزء من حقي فكيتو بيدي ايام الثورة "وبرشا ناس يعرفو اش عملت في الواقع وفي الفايسبوك وقتها" وباش نقعد طول حياتيي ناقم على بن علي وعلى طحانتو.
وفيلخر نحب نقول "موتوا بغيضكم ويرحم والديك يالبوعزيزي وبعد الثورة خير والحمد لله ناصرالمستضعفين.. والسلام.