لا تنجرّوا وراء الحملة المسعورة اللي عاملينهالكم حول ما يسمى بالتعويضات راهو الحكاية لا عندها لا ساس ولاراس … وكل حديث عن جبر ضرر في الظرف الحالي يعتبر هراء، بل إجرام في حق الدولة وعملية انتحارية لمسار العدالة الانتقالية وما نجم نقول كان لعنة الله علي كان سبب في إثارة ذلك التاريخ 25 جويلية، اللي بالنسبة لينا لا يمثل إلاّ عيد الجمهورية، و ذكرى اغتيال المناضل الفذّ محمد البراهمي. اليوم عنا خطر داهم عالبلاد اسمو كورونا والمفروض المسائل لخرى الكل توخر لتالي.
أمّا بحكم عملي الميداني وخبرتي في متابعة ملف العدالة الانتقالية منذ سنوات وقربي من الأطراف الكل في السلطة وجمعيات الضحايا، وجب عليّ تقديم الحقائق التالية:
1. صندوق الكرامة أمر حكومي صحح عليه رئيس الحكومة يوسف الشاهد في فيفري 2018، وأموالو لكل ترصد من الخارج من هبات وعطايا غير مشروطة وطريقة تسيير الصندوق تخضع لبروتوكول مالي أمضت عليه وزارة المالية و لذلك لا فائدة في الحديث على جبر ضرر مستمد من خزينة الدولة.
2. صندوق الكرامة يخص ضحايا الاستبداد من 1955 الى 2013 يعني بما فيهم ضحايا أحداث الرش ولذلك يزيو من الهزان و النفضان.
وراهو حسب القرار الإطاري، اللي يتمتعو بجبر ضرر مادي هوما حصريا: ضحايا القتل العمد، التعذيب الناجم عنه القتل العمد، الاغتصاب، الاعتداء الجنسي. يا ناس راهو ما فما حتى مليم يقدر يعوضلك كرامتك كان الدولة اغتصبتك بشقف بلار مكسر ولا قصتلك كرارزك ولا قتلتك تحت التعذيب هذاكا علاش اسمو جبر ضرر ومش تعويض، ولذا احشمو شوية و ما تخلطوش الامور في بعضها.
أخيب حاجة تجم تصير كي نذلو عباد أصحاب حق و نشيطنوهم لتسجيل نقاط سياسية مع النهضة. الناس هاذوما الجائحة زادتهم هشاشة وتهميش تزيدوا نتوما تذلوهم، لا أكثر لا أقل.
3. آه نسيت ! نهنّيكم، هيئة الحقيقة والكرامة في القرار الإطاري متاعها مسحت فم أي "مناضل" تلقى منصب سياسي أو حكومي (نائب شعب ، عضو ديوان بوزارة، مسؤول في حكومة أو مستشار في الرئاسة..) وتتحول قيمة التعويض متاعو آليا 0% بمجرد تلقيه المنصب.
4. اللي يحكي عليه الهاروني يوم 25 جويلية راهو مجرد توفير مقر لصندوق الكرامة بش ينجم يخدم ويبدى بإعادة تأهيل الناس وتوفير بطاقات العلاج و معالجة ملف المفروزين أمنيا. كل حديث عن فزاعة ال3000 مليار في الوقت الحالي هزان ونفضان وما عندوش لا ساس لا راس، وحتى كان المبلغ توفر، ماهوش بش يكون من شهريتك تهنى.
5. وأخيرا، تحبو تعرفو شنوة محضرلكم الشيخ cadeau للعودة المدرسية ؟ مشروع قانون مصالحة شاملة في القضايا الكل: فساد مالي وقضايا الدم. بما معناه، سي الغرياني اللي هو par contre يخلص من شهاريكم خدم على روحو مليح وحضرلكم قانون مفزع فيه عفو للناس والمجرّمة اللي دمرو أعراض الناس الكل، والي برّكوا البنوك ونهبو…ونحنا عنّا منو نسخة اللي يحب يتفضل.
بربي كفّوا عن هذه المشاحنات وهذا الهراء وما تذّلوش عباد لاحول ولاقوة لهم، وذاقو déjà أبشع أنواع التعذيب والحقرة في حياتهم..
وبربي ما تنفخوهملناش بحكاية منديلا كي تنازل على حقو راهي هذيكا حاجة نبيلة ويعطيه الصحة وأمورو، أما مش اللي ما يتنازلش على حقو يولي رخيص.
اللي عندو مشكلة مع هذا الكل، يمشي من حينو يتوجه لرئيس الجمهورية ويقنعو بش تونس تفسخ على الأقل 4 اتفاقيات دولية ممضية عليها.