بالحق ما نجمتش نشد روحي . الشيء اللي قاعد نرى فيه على الفايسبوك مهزلة وعفن وقذر ومنحط بكل الصيغ وبكل المقاييس . ما كنتش باش نتكلم على موضوع اعفاء السيدة فاتن الورغي الرئيسة المديرة العامة للشركة التونسية لأسواق الجملة لسببين :
-السبب الأول : أنو كل مسؤول في البلاد وفي أي بقعة في العالم ممكن يقع تعيينو والا الاعفاء متاعو لأنو هذا داخل في سنة التداول وهذا أمر طبيعي .
-السبب الثاني : أنك وقت تتكلم في موضوع فيه جدل كبير عالفايسبوك مستوى التعليقات باش يهزك لمواضيع وتفاهات ما عندها حتى علاقة بالموضوع الأصلي .
قبل ما نعطي أي رأي ميسالش نعطيكم المعطيات هاذي :
-الشركة التونسية لأسواق الجملة ما عندها حتى علاقة بموضوع الأسعار ولا تتدخل لا من قريب لا من بعيد، الشركة مهمتها تنظيم السوق والاشراف على المسائل اللوجستية والتنظيمية فيها بالصورة اللي تخلي الخدمات المسداة للفلاحين ووكلاء البيع والمشترين في المستوى .
-الشركة هي اللي تتولى استخلاص معاليم الاستغلال بالنسبة لوكلاء البيع والمعاليم الموظفة على عمليات البيع بالتنسيق مع التعاضدية العمالية لسوق الجملة .
شخصيا ، السيدة هاذي نعرفها منذ عشرات السنين : رفعة ودماثة أخلاق ، نظافة يد ، عندها الكفاءة اللازمة وعندها بعد انساني موش متوفر عند برشة .
كونها خدمت النهضة ، والأغلبية الساحقة ماللي يعرفوني يعرفوا معاداتي الواضحة جملة وتفصيلا للتنظيم والمرشد ، شخصيا لا أنا ولا عديد الناس اللي كانوا قراب منها لاحظوا هذا ولو للحظة .
اللي بعاد عالموضوع ويفتوا جملة وتفصيلا ، ما نقلكم شيء ، نقلكم فقط ان شاء الله وانتم تهزوا وتنفضوا تتفكروا حاجة وحدة : اللي اي واحد منكم ممكن يتنشر غسيلو وعرضو في هذا الفضاء العطن بالحق وبالباطل .
ستاتي موش باش يعجب برشة ، أما كلمة حق تتقال وفمة حاجة في الدنيا اسمها موت . الناس اللي تعرف وسكتت : تنجم تصيرلك الحكاية في كل وقت . المسؤولية زائلة وتلك طبيعة الأشياء أما هتك أعراض الناس هو اللي ما يزولش.