كلّو كوم وحكاية "سحب الوكالة" إلي جابها المرسوم الانتخابي كوم وحدو.

أيا سيدي بن سيدك، كي ما يعجبكش النائب(ة) الي ربح الانتخابات، تستنّى عام وتعمل عريضة سحب الوكالة مضروبة بالسفود واتفسرها مليح -أوكي الايزي باش تعمل أنموذج باش إتسهل عليك- واتقول الي النايب هذا موش نزيه ولا موش يخدم مليح ولا ما عملش مجهودو باش ايحقّق البرنامج متاعو وإتلمّ معاك 10% مالناخبين متاع الدائرة الانتخابية متاعك إيصحّحوا معاك. إتقوموا الصباح تمشيوا للبلدية ولا الإيزي. تأخذوا "تيكي" كان "الموزّع" يخدم وإلا إتشدّوا الصفّ وتعملوا تعريف بالإمضاء.

إتهز هاكي الوريقة الي فيها العريضة وتصحاحاتكم انتي وأصحابك للإيزي الصغيرةمتاع الدائرة متاعكم (الإيري) وتقعد تستنى لين "الإيزي" الكبيرة تاخو قرار. كان العريضة متاعك ما اتقبلتش مالإيزي، اتنجم تمشي للدائرة الابتدائية للمحكمة الإدارية الي ترابيا انتي تابعها تطعن.

كان العريضة متاعك اتقبلت بعون من الله وتوفيق منه، النائب الّي انتي وجماعتك اتحبوا اتطيزوه اينجم يطعن هوّة زادة. والحكاية فيها ابتدائي واستنئاف (في تونس ردّ بالك) وباش تقعد تستنّى أما لاباس ما فيهاش تعقيب. والحمد لله إنابة المحامي وجوبيّة في هاذي (شكرا يا واضع النصّ على توسيع مجال التدخّل).

آه مازال. كان اتقبلت العريضة متاعك نهائيا شنوّة ايصير ؟ النائب يتنحّا؟

لا. الإيزي اتنظّم انتخابات حاجة كالاستفتاء واتنادي الناخبين الكلّ متاع الدائرة الانتخابية متاعك موش ال10% وتسألهم سؤال :" اتحبّوا اتطيزوا النائب؟ " كان جاوبوا "لا"، النص ما إيقولش شنوّة ايصير أما مبدإيا يقعد النائب في بلاصتو وانتي وال10% صحابك الي صححوا معاك اتروحوا للدار تجرّون أذيال الخيبة وتتجرّعون مرارة الفشل. وعملتكم ما اتنجموا تعملوها كان مرة برك والنائب البليد باش يقعد على قلوبكم.

لكن... كان التصويت جاء "نعم" والنائب الي كمبنتوا عليه طاح. شنوّة ايصير ؟

الإيزي باش اتنظم انتخابات من أول وجديد أوكا شوفوا الشروط، أوكي قايمة طويلة وعريضة، ومعاهم 400 تزكية شطرهم نساء وشطرهم رجال وربعهم شباب، وكلّهم عاملين تعريف بالإمضاء ويلزمك تسكن غادي وحضّر شهادة الإقامة من توّة (تسكرة الضوّ + كنتراتو + كيتانس مالقباضة)... فمّة زادة الطعون في الترشحات والنتائج أما موش موضوعنا.

في تونس، ولاو فمة 161 دائرة انتخابية اتصوروا في كل دائرة، الجماعة الي موش فرحانين بالنائب المنتخب يعملوا سحب وكالة واحد في دورة تشريعية وحدة، الإيزي، على حسب ما فهمت، عندها على هالحساب خطر متاع 30 انتخابات تشريعية جزئية في العام... ومازال مجلس الجهات والأقاليم والبلديات... أصرف يا حسين. المال كثير ولا خوف من الفقر. والله وليّ التوفيق.

ملاحظة : رئيس الجمهورية موش معني بسحب الوكالة.