ساعات يفرض عليك عملك انك تحضر بعض اللقاءات.. ايا انا في يوم من الايام حضرت لقاء مشابه.. قاعدة في امان الله.. يهجم عليا واحد بالشكر والثناء والسعادة الغامرة التي اشعرتني للحظة وكأنه يقف أمام الفاتح صلاح الدين.. رغم أن الأمر لم يكن يستحق اصلا لا ذلك الاحتفاء ولا تلك البهجة.. ماربحش في اليناصيب السيد شاف بشر كيفو كيفا وانتهى..
ايا قلت موش مشكل شعبنا السمح يبالغ في كل شيء وفي تلك المبالغة يزهر النفاق و الترهدين والكذب الجميل..عادي يعني انا واحدة م الناس آخر حاجة تأثر فيا سلبا أو ايجابا الكلام.. لا أهتم اصلا لا للمديح ولا للذمّ أيضا.. اعرف من انا وهذا يكفي.
أيا السيد بعد مقدمات طويلة لم يأت بمثلها ابن منظور في لسان العرب.. بدأ يحرّض فيا.. ما تسكتش.. اعمللهم.. دنيلهم.. ويقدملي في مقترحات نضالية لا تجرأ عليها حتى حماس ويتهز ويتنفض وكشاكشو طالعة.. ويقلي اصدم واحنا معاك.. انا نفسرلو.. يا ولدي ما عندي وين نصدم انا راني موش في صدام اصلا.. مع حتى حد.. مجرد صحافية تخدم في خدمتها واكهو.. وهو يقلي لا يلزمك تعملهم عملة تقعد تاريخ!!!!!!.. يا ولدي يهديك.. اش باش نعمل.. نلبس حزام ناسف ونهجم على الناس.. شي.. يرغي ويزبد ويرعش بكلو.. بالعمل الناس لكل تتفرج فينا وباهتة..
زاد شوية قالي اشبيك ما قبلتنيش على الفايس بوك والا تقبل بالوجوه.. قتلو بكل برود طبعا نقبل بالوجوه.. اشبيني عامله زردة سيدي محرز.. اللي يجي يدخل.. حاله منشوراتي للعموم اما الأصدقاء ننتقي اشكون.. وقتلو انت اصلا لتوه نحكي معاك ساعة.. وموش عارفه انت اشكون والا اش تعمل في الدنيا..
قالي بثقة لا يمتلكها بايدن.. متعرفنيش انا فلان الفلاني ناشط في كذا وكذا وكذا الخ الخ الخ.. الحاصيلو CV متاع نشاط يدوخ.. متاع واحد يلزم لا يرقد لا ليل لا نهار.. لا ياكل لا يشرب.. فقط ينشط!!!!
المهم ما سليت روحي منو كان وجهي ولي في قفايا.. قعدت شوية ارتحت تنفست.. وقلت ندخل نتلصص على السيد نشاط ونستمتع بمواقفه المانديلية، الغيفارية..
دخلت..
ويا لهول ما وجدت..
آخر موقف كاتبو يحكي فيه على مسلسل الفلوجة وكيفاش الوزير عندو الحق في المنع والمجتمع ضيعو سامي الفهري والإعلام التافه.. ايا قلت موش مشكل شعبنا السمح يحب المسلسلات ومخو هذاكا اش قالو يقعد قدام التلفزة باش تربيه وتربيلو اولادو على خاطر هو دوره ينتهي بعد وضع النطفة مباشرة.. الباقي موش تابعو!
كملت..
نلقى السيد يتفاعل ويتداول في اخبار حول الحياة الافتراضية للثنائي مدام ومسيو الجمل.. وكيفاش رورات والا اش اسمها تخلي كوجينتها موسخة اي قلت عادي.. حياة مشاهير السوشيال ميديا باتت اليوم محل نقاش عادي..
هذا لكل مع ضربات كورة.. جمعة مباركة.. كويزات.. ترحم على الموتى الخ الخ الخ
هذا لكل وانا نستنى في مواقف ثورية تعكس خطاباته الرنانة اللي حسيت ناقصو كان يجبد على والدينا كلاشينكوف ويمحقنا من الخريطة.
اول موقف عرضني منذ أشهر… اشنوة حسب رايكم هههه… قيس يا معذبهم. عادي قلت خياره ورأيه ولن اصادر أفكار الناس.. بالك عمل مراجعات.. واصلا من غير مراجعات هاو الشعب لكل تحت العذاب سواء اللي المؤيدين والا المعارضين! يعني حرفيا احنا متعذبين!
زدت شوية هبطت قبل 25/7
صورة لعبير موسي.. مكتوب عليها البنط العريض.. نساء بلادي نساء ونصف …
قبلها بشهرين.. مهبط تصويرة لسيف الدين مخلوف.. معلق عليها.. الراجل الوحيد في تونس.. يعني حتى روحو الغاها من أجل سيف الدين… أيا ما نطولش عليكم.. بلوك ليه بالوقت!
وخرجت نجري ساقي أعلى من راسي........... وانا أشعر برغبة شديدة في ممارسة العنف الشديد بكل الوسائل المتوفرة!