"احنا موجودين ما تخافوش"

هو الحقيقة سي زهير كلامك وموقفك هو اللي يخوّف.. كلمتك تنجم تكون عادية ومنطقية في حملة انتخابية عادية و طبيعية.. لكن فاتك يا رجل اننا ابعد ما يكون عن ذلك..

ما قلته جميل وشاعري ينجم يشدّ الانتباه في تجمّع جماهيري لانصار حركة الشعب والا في كلمة موجزة في اطار تنافس انتخابي تتوفّر شروطه الانتخابية والديمقراطية ! لكن انت سي زهير جنحت الي انكار الواقع وتجاهلت التطرق الى المواضيع التي يفترض ان تتحدّث فيها سواء لإنارة الرأي العام او للتعليق عليها وتوضيح موقفك.. وهذه المواضيع هي :

• -ما حقيقة التحقيق معك؟

• -موقفك من التنكيل الذي يتعرض له منافسك الانتخابي العياشي زمال ؟

• موقفك من هيئة الانتخابات وماذا تقول ونحن علي ابواب حملة انتخابية تنطلق في غضون ساعات احد -مترشحيها في السجن؟

وشوف وهاني باش نحكي من الاخر..

السياسة عالم متوحش ودون مشاعر.. ويكذب عليك اللي يقلك نمارس السياسة بأخلاق.. اصلا الاخلاق والسياسة والسلطة مستحيل يجتمعو في مكان واحد الا في عقول السذج او ادعياء الطهورية الزائفة.. وعليه في هذا العالم يتم توظيف كل الاسلحة واوراق اللعب للوصول الي الهدف..

اما المشكل فين.. يبتذل اللعب عندما لا تكون داهية.. عندما تلعب بغباء.. عندما لا تكون لاعبا جيدا .. يعلم على أي الاوتار يعزف واي النغمات يجب ان تُقدّم للجمهور..

وبمنطق براغماتي بحت..

اقول لك انه توفرت لديك اوراق لعب رهيبة .. كانت يمكن ان تقلب معادلات كثيرة..

• اتصاليا كلمتك لولى كانت جيدة..

• الكلمة اللي فاتت تنجم تقول متوسطة..

• الكلمة متاع اليوم سيئة جدا جدا..

• كأنك موش عايش الوضع..

انت حسبت برشه سي زهير.. ركزت علي شكل الشخصية السياسية الواثقة، المتفائلة، التي تشعر المواطن بالأمان.. ولكن اصعب ما في هذه الشخصية هو ايجاد مضمون لصياغتها.. حيث لا تكفي كلمة "ما تخافوش احنا موجدين"

يلزم الجمهور يقتنع كيفاش انت موجود..

ثم الشخصية السياسية هذيكا تلعب ديما علي الجانب القيمي الذي يثير تعاطف الجمهور.. والجانب القيمي هذاكا كان يفرض عليك الليلة اتخاذ موقف والدفاع بشراسة عن منافسك الانتخابي الزمّال وما يتعرّض له .. ديجا هاذي كانت وصفة انتخابية جاهزة حصد بها قيس سعيد الكثير من التعاطف في 2019 .. واليوم لو راهنت علي تلك الوصفة كانت ستحقق لك الكثير من النقاط.. لكن تجاهلك لوضعه جعلك تطلق النار علي قدمك كما يقال..

اخيرا في السياسة.. يلزمك تحسب اما يلزم تجازف اكثر.. خايف وخّر.. تحب تلعب للخر يلزم تكون عندك شجاعة اكثر.. علي خاطر زمن المنطقة الرمادية وانصاف المواقف تجاوزناه.. والكادر الباهي متاع التصويرة والفصاحة الخ الخ الخ لكلو déjà vu معاك وكان لازمك طريقة جديدة لشدّ الانتباه لانك لهنا انت تتعامل مع السوشيال ميديا.. اللي يلزمها برشه افكار لشد الانتباه..

رغم انك كنت تقرا في النص قدامك ولكنك ماكنتش مرتاح.. كان التوتر ظاهر عليك برشه!

• صراحة كلمتك اليوم افقدتك نقاطا كثيرة..

• في وقت كانت لحظة لتسجيل ضربات قوية..!

• وعليه التدارك يجب ان يكون سريعا وقويا.. اذا اردت ان تواصل السباق.

ملاحظة : هذه قراءة سريعة في كلمة المترشح زهير المغزاوي.. وباش نبعدو من الهزان والنفضان هذه التدوينة كتبت بعقل بارد جدا ، من وجهة نظر مهنية بحتة طبعا تحتمل الخطأ كما الصواب، يعني حللت اللي شفتو بعيدا عن مع وضدّ!