نخب سياسية وفكرية و"انتلجنسيا" و"مثقّفين عضويين" وإعلاميين تنظّر وتبادر وتتحاور حول كلّ شيء... مدوّنون لديهم حلول ومُقترحات لكلّ شيء: ليبيا وسوريا وأردوغان والبحر الميّت والغاز والنفط والثروات وما-وراء البحار الإقليمة والدولية. شعب يستنى في حكومة.... وحكومة تتمنع.
تونس بلد الحداش مليون خبير أمنى وثلاثة ملايين خبير في القهوة والتاي والزيت والزيتون.... وفي الإستراتيجي والتكتيك. لكن لا أحد يتحدّث على جنوب يعيش الجَوْر.... بنية تحتية مهرّية وشباب عايش على هامش الهامش ونساء يُسلّط عليهنّ الجور المركّب (جور الدولة وجور المناخ وجور الجغرافيا وجور الثقافة) ....
كياسات تضاريسها تتماهى مع السلاسل الجبلية المحيطة بالمنطقة... بين الحفرة والحفرة حفرة وبين الهضبة والهضبة هضبة..... حزام قابس-مدنين حالته حليلة والبيست خير منه....
كميون البلدية يخدم مرّة في العشرة أيّام.... قدّام كلّ بيت نصف برميل وُضع على عَجلة تتراكم فوقه أكداس الزبلة. حتى تحنّ الكميونة وتتعدّى.
الماء مالح لا يصلح حتى تتوضّأ به في التواتليت... وأحياء طرفية جديدة تبقى بالأسبوع مقطوع عليها الماء لأنه وزارة التجهيز والبلدية لم تُخطّطا لمرحلة أبعد من "العهدة" (إلّي يجي بعدهم تو يتصرّف) ... وكلّ مدير متاع سوناد يجبد في الخزّان لجهة جماعته وإلّي ما عنده والي يمشي في الكرعين....
برشة ظلم.... موش ظلم راجل لزوجته وأخته... لالا... ظلم دولة لرعاياها وظلم مركز لهامش... برشة جور... موش بين ذكور وإناث...لالالا... بين شباب ضايع وليس أمامه غير الحرقة أو التهريب والمغامرة غير محسوبة النتائج.... وشباب عايش نهار الأحد ما يهمه في حدّ... ويحكي على الفنّ التشكيلي ومهرجانات المسرح والسينماء ويبلع في الدعم ويفكّر وين باش يعدّي ليلة راس العام...
جور مدارس لا تُنتج غير الجهل والبهامة وترسكل في الفشل ومدارس خاصة في مناطق راقية وُضعت في المدن الكبرى لتُعمّق الهوّة بين أبناء الشعب الواحد... جور مستشفيات تموت فيها النساء على فراش الولادة ويموت فيها الطفل بالمصرانة الزايدة ويموت فيها الكهل بسبب عدم توفر زريقة معقّمة....
برشة حقرة.... موش لأقليات بشرتهم سوداء... لالالالا... لنصف تونس اللوطاني بطمّ طميمه بسمرانه وسوده وأمازيغه وعربانه وحواياه وأعيانه ومُثقّفيه.... وزير التجهيز مدنيني لكنه غير معني بمعاناة أبناء جهته.... منذ تولى المنصب وهو لا يُحسن غير الكذب واختراع الإنجازات الوهمية....
نصف حركة النهضة من الجنوب.... وأكيد القيادات والمسؤولين يتدعدّوا من حزام قابس للوصول إلى جنوب لا يصلح إلاّ ليكون خزّان انتخابي ورافعة سياسية وحزام ناسف لمن تُخوّل له نفسه الإعتداء على حرمة "الحركة"....
جماعة حركة الشعب أغلبهم من الجنوب (عكارة جرجيس) .... لكن الجنوب بالنسبة لهم قنطرة يتعدّوا منها إلى ليبيا.... أو مادة لكتابة أطروحة أو إنجاز بحث علمي حول التراث الشعبي...... سياسيين يتعاركوا على وزارات السيادة.... هروبا من الوزارات التي بها تتحسّن ظروف الناس المعيشية... سياسيين ضيّعوا على الشعب فرص تاريخية للخروج من وضعية "اللاّ-شيء"....
دولة تشبه المردومة.... ونخب ما تنجم تكون كان فحم أنتجته تلك المردومة. فحم مرعوب لا يصلح لا للطبخ ولا للتدفئة.... برشة دخّان ورائحة ناتنة.
تبّا لكم ولحكومتكم ولمعارككم الزائفة....