قبل ما تفكّر في روحك فكّر في أولادك وفي عائلتك وفي جيرانك وفي زملائك... لا تمسح خنانتك وترمي المنديل في مكان يمكن أن يجلس فيه شخص آخر... لا تلمس بيديك جميع "الباقاتات" ... وانت تختار كأنك باش تشري سيارة.
كانك مريض بالبرودة البس قفازات قبل ما تقصّ السلاطة وتعبّي كسكروت وتمدّه لشخص ممكن أن تنتقل إليه العدوى... ما تكحّش في الطنجرة وتنفّس بعيد على ماكينة القهوة. كانك مريض موش لازم تشرب من الدبوسة وأنت تعرف أنّ بقية أفراد العائلة باش يشربوا منها (هي صنعة خايبة الشربان من نفس الكأس ومن نفس الدبوسة)…
كانك مريض موش لا زم تتكلّم في تاليفون ولدك وإلاّ بنتك وإلاّ زوجتك... حتى تاليفونك بعد ما تتكلّم امسحه بشوية خلّ. كانك مريض (ة) شدّ دارك موش لازم تمشي تعزّي... وتدور على الناس تبوس فيهم بالواحد. وتستنى الدفينة وترجع نهار الفرق وأنت حالتك حليلة. وتعدّي تاليفونك لأهل الميّت "هاك فلانة تحب تعزيك"…
كانك مريض (ة) ارقد في غرفة وحدك وحطّ بجنبك كأس خلّ وشطر بصلة وسنة ثوم... كانك مريض (ة) ما تلومش على كنتك وإلاّ ابنتك أمّ الصغار انها ما جاتش تزورك... بالعكس قولي لها "شدّ دارك وردّ بالك على صغارك".
كان عندك شكون روّح من السفر حتى كان تعدّى في المطار من الاختبار... حطّ الفاليجة في الشمس ونظّف الصبّاط مليح والفلوس حاول تعقّمها: امسحها بالخل.
كورونا تعمل فارعة في مجتمعات تسودها الفردانية والأنانية وعدم الانتباه للآخر... وبعدي توفى الدنيا.... وأيضا في مجتمعات ثقافتها الصحية ضعيفة ونمط عيشها فيه برشة تفرعيس وماخذة بالخاطر حتى على حساب صحّة المجموعة.
كان عندك مريض وشاكك فيه... موش لازم تخبّي وتتستر وكأنه عامل جريمة. بلغ الجهات المعنية وخليهم يتصرّفوا ... مسؤولية كبيرة قدّام ربي.
اللهمّ احم تونس واحفظ شعبها....