رئيس الجمهورية يتدخل لفائدة الاعلامي علاء الشابي عن طريق منحه ترخيصا استثنائيا لدخول فرنسا برفقة زوجته لإجراء فحوصات طبية عاجلة نظرا لغلق فرنسا حدودها بسبب وباء كورونا.
هو ربي يشفيه على كلّ حال، وربي يشفي جميع المرضى ... تبقّى عندي حويجة سيدي الرئيس ما نحبهاش تڤعد في ڤلبي ...فمّة مواطنة تونسية اسمها سهام عزيزي، سافرت في رحلة عمل للغابون وتوفّات غادي في ظروف غامضة وإلى اليوم ومنذ ثلاثة اسابيع وجثتها في ثلاجة الموتى.
أين أنت من ذلك الموضوع؟؟؟
ماكم تڤولوا اللّي أنتم ساهرين على سلامة وأمن الشعب هذا! هاو مواطنة ميتة ما تحركتوش لأجلها الى الآن!
هاكي المرة تركيا في الأزمة الاخيرة متاع الكورونا، بعثت طيارة خاصة باش روحت بمواطن من جنوب أفريقيا وبعدها بأيام بعثت طيارة مجهزة بكل ما يلزم وبفريق طبي كامل جابت مواطن واحد من السودان مصاب بالكورونا…
ما نحبّش نڤولها ولكن باش نڤولها، للأسف انّك تكون مشهور ديما على راسك ريشة والنّاس الكلّ تجري في حظوظك..
جماعة النهضة زادة الواحد وراء خوه يكلموا ويعاودوا يطّمنوا على صحة الشابّي (منيش ضدّ ذلك) ولكنّي ضدّ التمييز بين أبناء نفس الوطن لمجرّد انّو واحد مشهور والثاني مغمور …
أين الدولة من المواطنين الزواولة اللّي يموتوا في بيبان السبيطارات بعد ما يسكروا في وجوههم كلّ أبواب الامل والعلاج!
أين الدولة من مرضى السرطان اللّي ما عندهمش فلوس باش يعالجوا علاش ما تتدّخلش لفايدتهم! ماهم توانسة ويحبّوا يعيشوا حتّى همّا!!!
عقليّة ماهيش باش تتبدّل للأسف، والمعاملات والممارسات هذي باش تڤعد ملاحقتنا الى يوم يبعثون.
أنّستوا .