في القباضة المالية، العون وراء الشباك واضعة كمامة ولابسة قفازات وعاملة جدار عازل بينها وبين المواطن... طلبت منها مطبوعة قالت لي "شد الصف... ايجاني من الشباك " مدت لي مطبوعة قلت لها عندي زوز تصاريح جاوبتني بنطرة " اعمل فوتوكوبي والا خرّج من الانترنت ما نجم نعطي كان كعبة (نعرف الي هي تكذب)".
وقفت في الصف ننتظر في دوري. جاء مواطن بيده أوراق ودفتر شيكات اتجه نحو العون الي في الشباك الثاني يبدو انها (معرفة) بعد التوشحيل قالت له انا اليوم فقط تنابر وفينيات... ثمّ قالت له هات هات واخذت التصريح والشيك ومدتهم لزميلتها. عملت لها إشارة برأسها تعني ok ...
انتظرت قليلا ومشيت نعمل نظرة. صاحت في وجهي " شدّ الصف" ... جاوبتها " انا شادة الصف ومحترمة التباعد وعاملة كمامة اما السيد متاع الشيك موش باش يتعدى قبلي هاني ساكتة" ... جنّ جنونها ووقفت وقالت " ما نيش خادمة والله نهار اليوم لاني ضاربة ضربة"... جاءت السيدة القابضة قالت لها " تخدم على روحك وجاوبهم بالسكات" ... رجعت شدت بقعتها وعداتني مشيت للكاسة نلقاها عدات بالغالط ( جاوبتني بالسكات) ... رجعت لها قالت " جيب التوصيل واستنى في الصف تو نعديك مرة اخرى " .... رجعت شديت الصف.....
في الاثناء المواطن متاع الشيك جاء... معاه دبوسة ماء باردة وحل الباب ودخل وراء الشباك وكهّب على السيدة الي عاملة confinement وبقي يحكي معاها حتى كملت خدمت له ومدّت الشيك لزميلتها مشات للكاسة جابت له التوصيل....
هو خارج قال لها " باي جوجو يرحم والديك" وعمل ضحكة متاع بلادة... قلت له " مانيش مسامحتك لا في الدنيا ولا في الاخرة"... هبل ورجع لي وقال " احترم روحك". قلت له " انا محترمة روحي ومحترمة الناس الي معايا اما انت هو الي موش محترم"...
شفتوه مفهوم الاحترام؟ شفتوه الإذلال؟ شفتوه الفساد من وين يبدأ؟ شفتوها تضارب المصالح؟
مصالح تتضارب بالبونية ومصالح تتضارب بالماشطة....
هذا المواطن في أقصى الحالات صاحب محلّ يبيع قطع الغيار وعنده شركة رأس مالها ألف دينار وممكن اليوم اول مرة يشد في يديه دفتر شيكات وفي الغالب يكون رصيده في الاحمر وعنده كمبيالات راجعين ويحكي على الاحترام.
والعون رأسمالها كود تدخل به للسيستام ... تمارس في السلطة على المواطنين وتكش وتنشّ وتصرفق في العباد على اليمين وعلى اليسار.... وحتى واحد ما يكلّمها والي يكلّمها تعاقبه لانها فلسة في سيستام دولة الإذلال والمهانة....
قلّك كرامة وحقوق الإنسان ومواطنة وشعب يريد....
شعب نصفه ضاربه الذلّ.... ونصفه الثاني يمارس في تضارب المصالح بشرعية السيستام.
المشهد لا علاقة له بالثورة ولا النهضة ولا بالاتحاد ولا يقيس سعيد.... عندي 22 سنة نعيش في نفس الفيلم في القباضات وفي مكاتب البريد....
المحسوبية والرشوة والإذلال وتضارب المصالح ثقافة في بلادي. وطبيعي انه اي شخص يشد كرسي يتحرّك في نفس السياق الي تدور فيه دواليب السيستام….