السؤال الصحيح الّي طرحه لطفي العبدلي بعد إيقاف عرض الكلصون في قليبية: " شكون يحكم في البلاد؟"… نعم بأي سلطة وبأي قانون تتوقف العروض؟ شكون موكول له اتخاذ قرار حذف عرض مسرحي أو منع بث شريط أو نشر مقال …. شكون يقيّم وشكون يتخذ القرار؟ وبأي مقاييس؟
هل بمقاييس مدنية الدولة وعقلانية الدستور الضامن لحرية الضمير وحرية التعبير ام بمقاييس الديني: المقدّس والمدنّس/ الحرام والحلال؟ وهل يوجد اتفاق حول تعريف المقدّس؟ وان وجد اتفاق فهل كلصون عبير يصنّف ضمن مقدّسات الشعب التونسي؟
لحد علمي مقدسات الشعب التونسي هي القرآن والمساجد والمعابد والكنائس … وحتى هذا موش اكيد فقد وقع الاعتداء على القرآن ماديا ورمزيا وتحرقت مساجد وتمزقت مصاحف ولم نسمع باي حركة احتجاجية كالتي أحدثها الاعتداء على كلصون عبير… وحتى الذين احتجوا نعتوا بالتطرف والظلامية. وقيل فيهم انهم أعداء الحرية.
انتهى عهد الصنصرة والرقابة.
ما عجبكش الكلام ارفع قضية في الثلب… والا اعمل لائحة( موش فالحين في اللوائح؟) تطالب بسحب صفة ممثل من لطفي العبدلي… والا لائحة تصنفه ضمن قائمة الممنوعين من الصعود على المسارح في تونس… والا قدّم مشروع قانون لإعادة إحياء إدارة الرقابة والصنصرة في وزارة الداخلية ( متاعكم عمار 404)…
أو اقترح مشروع معجم لتحديد الكلمات والجمل المسموح باستعمالها في النصوص المسرحية وفي الرواية والقصة والشعر. والا اطلب من إدارة التراث تحديد قائمة في المعالم التاريخية والتراثية التي يمنع التهكّم منها… وعلاش لا تتحدد قائمة الشخصيات التي تصنف ضمن المقدّس. واعملوا جلسة عامة حولها وناقشوها وصوتوا مع او ضد…. وكل واحد يجيب مقدّساته وبحياة رأس ثورة البرويطة الي كركرت الفاشية والتجمعية والكناطرية ورجعتهم للمشهد من الباب الكبير.
اما تستعمل معارفك ونفوذك باش تمنع فنان من التعبير فهذا رجوع إلى مربعات ما قبل دستور الجمهورية الثانية وزمن الصنصرة وتكميم الأفواه … العروض المسرحية مبرمجة من قبل والناس دافعة فلوسها وقاصة تذاكرها والمعتمد قال ضغطوا عليه باش يلغي العرض.
شكون ضغطوا عليه؟
أحيانا حادثة صغيرة وتافهة تكبر وتتحوّل إلى حركة …. والله شيء يحشّم اولادنا باش يقروا في كتب التاريخ على انتفاضة الكلصون بقيادة الزعيم لطفي العبدلي شهر ميدو … أوت 2020. عام الجائحة في الشهر الذي وقع فيه انفجار بيروت والشعب اللبناني هبط بعشرات الآلاف إلى الشوارع مطالبا برحيل شيوخ الطوائف وإنهاء حكم اللوبيات.
التوانسة باش يهبطوا للشارع للمطالبة برحيل الفاشية وانهاء حكم الكلاصين. عرفتوا شكون يحكم في تونس؟ ملابس داخلية رجالية ونسائية. كلاصن وبوصطوات. برافو لطفي العبدلي…. ليس على المسرحية (لأنها تافهة وتقزز) وإنما لأنك جاوبت على سؤال أكبر المحللين السياسيين ما وصلوش يجاوبوا عليه. فككت المشهد بمقاربة " الكلصون"….