علاش النهضة قوية في السلطة والدولة؟ خاطر عندها رئاسة الجمهورية؟ طبعا لا...ما عندهاش.. على خاطر عندها كتلة كبيرة في المجلس إلى يعمل القوانين ويعين الحكومة....صاحبة السلطة بالدستور... علاش النداء شكل الحكومة بعد الإنتخابات؟ خاطرو فاز بالرئاسة؟...طبعا لا... خاطر جاب الكتلة الاكبر في المجلس…
وعلاش الشاهد متمسك برئاسة الحكومة؟ خاطر يلزم 109 نواب بش يعزلوه...واليوم ما ثماش وعلاش السبسي ما ينجمش يعزلو؟ لانو فاقد للصلاحيات الدستورية لعزله بدون ان يقرر المجلس...وماعندوش 109 نواب بش يعزلوه...اما بلائحة لوم ...او بطلب منه مباشرة... ولأنو الشاهد تساندو كتلتين وازنة..النهضة والوطنية....
وعلاش العشرات من قيادات الحراك استقالو مع بعضهم؟...خاطرهم ما يحبوش المرزوقي؟
طبعا لا...وهوما قالوها...خاطر الإنتخابات التشريعية على الأبواب...ورئيس الحزب مهتم بشخصو والرئاسية...ومهمل التشريعية...في حين ان دور الأحزاب بش تخدم الشعب بالسلطة الفعلية... موش خدمة شخص مشكلتو سلطة رمزية…
وحنا اليسار اتعس…موش عارف كوعو من بوعو… تشوف في العرك…الي خلفيتو الحقيقية على شكون يمثلو في الرئاسية المقبلة…هههه… وتشوف في عقلية وسلوكيات مهملة كليا لتحضير الانتخابات التشريعية على بعيد… من كل النواحي الي تتطلبها….وهي كثيرة… وكأنها تتحضر في الاسابيع الأخيرة قبل بداية الحملة الرسمية…كيف السلوكيات الهاوية الفاشلة العادية…
وتشوف في نفس الوقت في برشة حديث ووضع كل المجهود في التحركات من أجل إسقاط الحكومة في الشارع…بدون بديل جدي قابل للتنفيذ… وخصوصا وقت تشوف في نفس الوقت مع ها الحديث.. اهمال تام للتحضير للتشريعية…
وكأنهم ما يجيوش متوازيين مع بعضهم…بعقلية تقديم الأهم على المهم…او العاجل على اللاحق…وبالطببعة التشريعية موش من الأهم… وكأنهم الخصوم ما بداوش حملتهم التشريعية بعد… تقولش عليك تشوف في مسابقة كأس…بين فرق تلعب في الرابطة المحترفة وفرق في أقسام الهواة…
الواحد يلزمو يقعد كل يوم يذكر بهذه البديهيات…خاطر الطبقة السياسية الي تحكم ملهيتهم بحكاية الرئاسة…وهوما غاطسين فيها للعنكوش… وخصوصا وقت تكثر الخزعبلات حولها… ياخي جد عليكم إلى النهضة موش عيونها قبل كل شيء وديما على التشريعية…مركز السلطة ومفاصل الدولة… إلى قمعتها في الماضي؟
ياخي ما تشوفوش الي موقعها اليوم في المجلس هو الي جعل النهضة تكون اللاعب المحوري في تقرير مصير الحكومة…يعني البلاد…خصوصا بعد فرقعة النداء الي كان عندو الكتلة الأكبر؟
ياخي ما تشوفوش ان موقعها الجديد…هذكا الي ما خلى حتى طرف ينجم يحط إبرة في خيط إلا بموافقتها…وأصبحت تتحكم في المشهد؟
وياخي زعمة بالحق النهضة شارطة على الشاهد عدم الترشح للرئاسية…ولا الحكاية لكلها تسويق سياسي…وتلهية لخرين بالعرك على الرئاسية؟ وزعمة بالحق الغنوشي بش يترشح للرئاسية…وهو يعرف إلى ما عندوش حظوظ في النجاح في الدور الثاني؟…وزعمة يقدم على هذا الفشل…وزعمة مؤسسات النهضة تخليه يعمل هذه المخاطرة حتى لوكان جاء عندو رغبة شخصية جامحة للموقع ؟
وعلاش النهضة ما يساعدهاش الشاهد في الرئاسة…ويسهللها العلاقات العامة مع الأطراف الخارجية الجيوسياسية والعالمية الى ما يحبوهاش…وتكون هي في الحكومة وفي مفاصل الدولة…ياخي نسيتو حكمها على رأس الترويكا…مع المرزوقي "الحقوقي" في الرئاسة؟
وياخي الشاهد والنهضة موش متحالفين ومتفقين على نفس البرنامج ويدافعوا على نفس المصالح…وإجمالا عندهم نفس الأصدقاء في تونس وفي الخارج ؟
الحاصيلو…
ربي يفرج عليه الشعب التونسي…