ما غاظني كان الخوانجية ياكلوا في خبزة باردة لا تعبوا عليها لا شيء..

هكذا دون احدهم.

هات نتفاهموا، راهم الخوانجية وانتوما والدساترة تداولوا على النضال. قام بن علي عزل بورقيبة وبهذل بحالو، قاموا الدساترة تحالفوا معاه وقالولي زيدو يستاهل مازال يتنفس، وهبطوا الاصنام الكل الي ركزوها في المدن قبل 87 وهوما باش يموتوا بالفرحة، ونحوها من المدن بعد 87 وهوما باش يموتوا بالفرحة!

قمتوا انتم وخدمتوا عند بن علي مكاسة وخمّاسة، ثمّ شكون يوزع في الاشرطة الجنسية المفبركة، وثم شكون يدور في الحوم يلقاش خلية مجتمعة، يلقاش مشبوه متورط في النضال، يلقاش شاب ماشي يصلي في الفجر، يلقاش وحدة عاملة مساك في حجابها..

قاموا الخوانجية، لأغراض سياسية ورغبة في السلطة،أي أي كانوا يحبوا يحكموا وإلا يشاركوا في الحكم..انتخابات 89 وربحوها، مظاهرات وتظاهروها، صدامات وصادموها، الكريموجان عبت منو جواجيشهم، سجون ودخلوها، شهداء وقدموهم، تعذيب وتعذبوه، تهجير وتهجروه، الصحاري وماتوا فيها، النيل الي هو النيل وغرقت فيه ذريهم، القناطر وتدفنوا فيها، الاعدام بالبالة، الاشغال الشاقة بلا حساب…

وقتيتها كانت قفة قضية لزوجة سجين تخلي داركم يجيبولك في القفة 5 سنين، كانت تفتوفة النضال الصغيــــــرة "شويتح"تهز مولاها وراء الشمس، وقت الي كانت أحزاب الموالاة ماهيش قادرة تجمع 30 منخرط، كان غيرها عندو 30 الف سجين وقدهم مهجرين ومشردين وأكثر منهم برشا سترهم ربي.

كي تمت 7 نوفمبر، وبدت سبعطاش ديسمبر، حبسوا الخوانجية النضال، ساعتها تقدموا الدساترة وخذوا المشعل، جبدوا الاصنام من دهاليزها، مسحوا عليها الغبرة وركزوها في الساحات العامة وهوما باش يموتوا بالفرحة، قمتوا انتم وبديتوا النضال، وهات يا اضرابات وهات يا قطع طريق وهات يا قطع ارزاق وهات يا ركوب على المنظمات الاجتماعية والإعلامية والثقافية..

واليوم هاو عندكم 8 سنوات وانتم تناضلوا ما تسجن منكم حتى واحد..في حين الخوانجية في عامين 92-93 وصلوا 100الف بين السجون والمنافي والحصار والفرز.. هكا نعرفوا الي النضال ضد 7 نوفمبر ماهوش هو النضال ضد 17 ديسمبر..النضال من أجل الصناديق ليس هو النضال ضد الصناديق.