بعد نجاح اليوم الوطني للتلقيح...وانشالله يلقحو التوانسة لكل... حتى نتخلصو من الوباء اللعين ونرجعو لحياتنا العادية... وزادة نبوسو ونعنقو... وهذا في بالي واجب وطني... وموش مزية من حد.. ما عملتوش حكومة المشيشي وانشالله وزرتها ما عادش يجيهم النوم على عدم الإهتمام بحياة التوانسة... مما تسبب في ألاف من شهداء الكوفيد بسبب اهتمامهم كان بمصالحهم .. وزادة إلي عملوه مبارح...اليوم الوطني للتلقيح.. بعد ما جاتنا ملايين التلاقيح إعانة من الخارج بسبب آلاف شهداء الكوفيد متاع المش ومن معه... راهم ما عملوش مزية... قامو بالواجب الي تحتمو المسؤولية الي ترشحو ليها... وما شاورو حد باش يترشحو ليها.. وما غصب عليهم حد باش يترشحولها... ولا فارينة إذا…
والحساب باش يكون بعد ما يوفاو ملايين التلاقيح في زنود المواطنين... خاطر إذا كان ما عملوهاش لا قدر الله وتتلف التلاقيح.... نوليو وقتها نعملولهم ديڨاج... ونحملوهم مسؤولية الشهداء القادمين لا قدر الله... والفارينة لمن قام بواجبه من المسؤولين السياسيين... صحة رقعة وقلة حياء خسيسة متاع متسلقين وأصحاب مصالح خاصة. .. وبلطجة فايسبوكية منتنة الأخلاق السياسية ومتخلفة.. وما تصير كان من انفار حطو رواحهم في موقع الرعية والقطيع... وموش مواطنين يحاسبو المسؤولين على القيام بالواجب من عدمه…
ويعد الشكر إلي ما يمشي كان للجيش الأبيض... المدني والوطني... والمتطوعين من المجتمع المدني.. يلزم نرجعو للصحيح...مستقبل تونس اليوم وين ..
وما انجمو كان نتساءلو وين ماشيين بعد 25؟
وهانا... نلقاو تواتر التصريحات من قرطاج... تكرر على مسامعنا ان خارطة الطريق سيعلن عنها الرئيس... كيفما يريد... وعندما يريد...وفي نطاق احترام الدستور.
عاد وخيكم بما انو موش امي في القانون....وخدمتو منذ عقود طويلة فهم النصوص القانونية وكيفية تطبيقها في الواقع أمام المحاكم... وموش عنعنتها للطلبة بش يحفظوها ... كل يوم يكثر الشك عندو في ما يتعلق باحترام الدستور وهو يشوف في التطبيق.
خوكم طاست مخو قاعدة تقولو.... ان الدستور اقتصر على الفصل 80 حسب"التأويل" الحكيم .... والباقي بكلو أكله الحمار اليوم... وجماعة الفيراج عاملة فيها موش فاهمة... وزادة قاعد يشوف.... انو عند برشة فارينيبن... توالطت الحكاية عليهم ... وبداو يعملو في تصريحات وكأنهم ما كانوش شالقين بيها ملول... أو أنهم وقت قابلو الرئيس قبل 25 وقالولو وش يحبو... بش ياخذ بتمنياتهم... يا والله أحوال .
وهاو بعد ما تتالت الاجراءات الاستثنائية اللاقانونية ضد الحريات العامة والفردية... بتعلة الخطر الداهم وأمر حالة الطوارئ غير الدستوري ... وآخرتها 45 قاضي هبطو بيان مشترك يقولو فيه انو عندهم "معلومات متظافرة" تفيد ان قضاة تونس تصنفو S17.. ومنع الحزب الدستوري الحر من تنظيم مؤتمره...وهذا بعد ما منع بعد 25 كل تجمع لأكثر من 3 أشخاص وقال للجماهير زارتنا البركة بيكم وأماتكم وعايلاتكم تستنى فيكم (تعجبني ياسر فازة التطريدة بذخامة هاذي... صارتلي وانا صغير) ... و قاللهم راني فهمتكم... وتو نتصرف وحدي... فأنتم الذين تريدون....
وجماعة الفيراج بعد الفارينة ... مازالو عاملين فيها موش هنا وزيد.. بعد الخطب العصماء الفاشستية الكحلة. .. إلي تحكي على استئصال الفيروسات والميكروبات والاورام السرطانية السياسية...وحتى بن علي ما تجرأش يحكي بيها خوفا من أسياده الممولين... ولو انو مارسها... في تناقض بين القول والفعل... والجماعة ديما عاملين فيها موش هنا.
وبعد تواصل عدم استقبال الرئيس للأطراف السياسية الي شرعت للتحول المبارك يوم 25 وعملتلو الفارينة ... نكاية في النهضة وقت معظمهم حكمو معاها.. في فترات مختلفة.. واتسببو معاها.. َولو بأقل منها فيما آلت إليها الأوضاع... ولتوا ما اعترفوش بمسؤوليتهم فيها.. وخصوصا هاك جماعة النداء وفقاقيعه الحالية بين 2014 و2019…
ولخرين في حكومة الفخفاخ... وخاصة حركة الشعب الي بعد ما كثرتلها من الفارينة تلقا روحها في التوش... وما ننساوش انو كان عندها زادة وزير تربية عامل فيها مستقيل في حكومة العريض... حتى مشات حكومة العريض باعتصام المصير... واتطرد معاها.
ورغم ان التيار خذى مسافة نوعية من التطبيق غير الدستوري للفصل 80. ...وهاو حتى ثمة شكون منو بعد ما عمل فرديا كراسي وفارينة للإنقلاب على الدستور... رجعلو شاهد لعقل.. وعمل مارش آريار.... لكن يبقي غيرو برشة...وهاني باش نقعد بالقدر…
وديما جماعة الفيراج عاملين فيها موش هنا…
وبعد ما خلاهم الحاكم بأمره لكل في الفيراج... بعد ما استغلهم واركب عليهم... وهو أصلا ضد وجودهم حتي كأحزاب وكنواب.. وعندو كل سلطة تشريعية مستقلة... وكل سلطة قضائية مستقلة.. و التفريق بين السلطات كيف ما هو موجود في كل بلاد متحضرة... لكلها يلزم تمشي في خبر كان....
ومازالو عاملين فيها موش هنا…
وهذا لكلو تبين اليوم.. وموش فقط من الخطب العصماء... وإنما خاصة بقرارات الأمر الواقع (يفهمها هاذي هو) منذ إنقلاب 25…
الخ.... الخ.... ولي نسيتو راهو برشة... برشة.... وانتجمو اتضيفوه…
فبحيث .. اليوم قيادة النهضة واضحة... اتخذت وضعية احنى ظهرك حتى يطلع الفجر... كيف ما عملت في بداية التسعينات من القرن الماضي...أمام بطش بن علي..
إيه... وانتم جماعة الفيراج؟ وين ماشيين؟ يا جماعة الفيراج؟ يلي ساندتو الإنقلاب على الدستور؟
والمجتمع المدني الأصيل.. الي قال انو عندو خارطة طريق؟ زعمة عملت فيه السخانة ومشى يعوم؟ والأحزاب إلي تندعي انها ديمقراطية؟ زادة مشات تعوم... حتى يفوت الفوت؟ هانا.. قاعدين نستناو.... وين حيكم... وخاصة نقصو برشة من التردد والخوف.... حتى حد ماو هازز السماء على غيرو…
تنويه...
ويمشيش في بالكم نتزايد على حد؟ حتى آنا هاني قاعد في الفيراج كيفهم تحت سخانة الشهيلي.... ولو بمحض إرادتي ومن غير ما ندهن وجهي بالفارينة توقيا من الشمس والذبذبات الالترافيولي... وتهافت الذبان لكحل. طبعا... ها الذبان لكحل... كان ما زال موجود منو بين أصدقائي في حسابي هذا ما يعلقش... ما عنديش وقت ليه... باش اناقش معاه بربريتو...كل واحد يختار شكون يصادق...
يمشي يكتب في حيطو وهو حر…ويمارس فيه حرية تعبيرو البربربية.. لكن موش عندي.. خاطرنا خطان مستويان لا يلتقيان… خاطرني نختار أصدقائي الي نقعد معاهم. ونحكي وانبر ونعمل جو معاهم…كيف كل تونسي يحترم نفسو..