"... وبيّن رئيس الجمهورية، أيضا، أن ما يُشاع في بعض وسائل الإعلام وفي عدد من وسائل التواصل الاجتماعي لا علاقة له إطلاقا بالواقع، وللأسف تجد الكثير من الأطراف المناوئة للديمقراطية وللحرية وللعدالة آذانا صاغية في الظاهر ولكن هذه الآذان التي تُشيع الأكاذيب والمغالطات مقابل مبالغ مالية كبيرة هدفها الإساءة لتونس وللشعب التونسي... "
هذه فقرة من بيان الرئاسة حول المكالمة الهاتفية بين سعيد وماكرون.
للتذكير فقط.. ماكرون هذا رئيس فرانسا.. وسعيد هذا رئيس تونس. ورئيس تونس يفهّم في رئيس فرانسا اللي جماعة التواصل الاجتماعي وخاصة هاك العايق الفايسبوك يكذبوا على تونس متاع سعيّد.. ويقولوا عليها في حاجات خايبة ما تتقالش..
بالعمل سعيد ما نجمش يذكرها في البيان على ماهي خايبة.. رغم اللي هي بلاد غاطسة في الحرية والديمقراطية للعنكوش.. تي آخر مرة الجماهير خرجت تتظاهر قريب تهبل بالديمقراطية.. بالعمل العباد رفسوا بعضهم ومات منهم مواطن مت شدة الفرحة اسمو رضا بوزيان...
عاد نرجعوا للبيان الجميل.. لا محالة هو بيان مشكشك شوية.. بحيث انا واحد مالناس ما نجمتش نفرز بين الوذنين الصاغية للأطراف الحلوفة اللي ما تحبش الديمقراطية والحرية.. والوذنين اللي تنشر في الإشاعات مقابل برشا فلوس...
بالحق ما فهمتش آناهي الوذنين اللي تسمع والوذنين اللي تتكلم...؟ طبعا انو الوذنين تتكلم وتنشر في الإشاعات مجاز رئاسي رفيع ما زال مكشطي.. تابع نظرية المفكر شفتر والداودي الدموي متاع الميليشيات اللي بش تعوض القضاء... وكيفاش الوذنين تتظاهر بالسمع وهي لا تسمع...!
و"لكن" متاع الاستدراك على ماذا تستدرك؟
والمبالغ المالية وقتاش تولي كبيرة ؟ زعمة انطلاقا من مليون وثمنميات صوردي والا هو مليار والا دولار ...!
حاصيلو...