هاذم 27 نايب عملو بلاغ مشترك.. يطالبو فيه بوضع حد "للمرحلة الاستثنائية"... وبانتخابات تشريعية ورئاسية سابقة لأوانها.. ويقولو هذا خاطر قيس سعيد "فشل" في ما وعد به... وينادو بحوار وطني يفضي لذلك.. بدون وضع شروط..
طبعا التوصيف الصحيح عندي هو انو المنقلب على الدستور...انقلب على الدستور... وما فشلش لأنو ماض قدما في تنفيذ مشروعه متاع البني القاعدي.. وتقدم فيه أشواطا مهمة...وهذا هو السبب الوحيد إلي خلاهم يعملو بيانهم المشترك...ويناديو بحوار…
عاد آنا رغما عن ذلك... نوافقهم في طلب إنتخابات سابقة لأوانها... والحوار لخلق ميزان قوى سياسي يفرض المطلب.... ولو اني اختلف معاهم في توصيف الانقلاب على الدستور...وفي عدم التمسك بالوضوح بالدستور إلي يطالبو بإنتخابات على أساسه.. الخ... نوافقهم لأنو المخرج الدستوري الوحيد...والعبرة في السياسة بنتائجها في الواقع..
وموش اني نقعد شايخ في بقعتي انظر مع طاست مخي...خاطر وقتها ثمة طرق أخرى باش نشيخ روحي... وموش على حساب مستقبل تونس وشعبها. لكن... لكن....موش هذا وغيرو إلي حبيت انركز عليه.. خاطر قلتو قبل.. وديما نقول فيه... وديما بش نقولو.. هاذاكا رأيي..
حبيت فقط انبه..انو اليوم ثمة برشة جبن سياسي... قدام الحكم الفردي و حشدو... و شفنا شيئ يشبهلو قبل... بعد عويمين من انقلاب بن علي... جبن.. خاطر إلي كان يجري على مصلحة بمساندة الإنقلاب.. مصمص من المنقلب على الدستور.. وما بقا كان الجبن.
عاد توا...باش تسمعو برشة طزز حكمة... ولي هذا باش يحط شروطه للحوار....ويعمل فيها منو تخرج. إلي بش يقلك نقعد مع هذا وما نقعدش مع هذا...خاطر بيه وعليه... وكانو هو ملايكة. ولي باش يقلك ما نقعد إلا بالشرط هذا أو بالشرط هذا... وفي غيابه ما نقعدش... الخ... من الخزعبلات للهروب... وقلة الحياء.
قلة حياء...خاطرهم يغالطو في الشعب بكل صحة رقعة...خاطرهم لكلهم قعدو مع بعضهم قبل في حوارات كثيرة ... مثلا إثر الثورة تحت قيادة اتحاد الشغل والرابطة وهيئة المحامين... او في الحوار الوطني بقيادة نفس الأطراف... بعد اعتصام الرحيل في باردو... إثر اغتيال الشهيدين بلعيد والبراهمي..
ومانيش باش نحكي على مشاركة البعض للبعض الآخر في نفس الحكومات... تعرفوها لكل.. الخ... وراهم باش يعملونا فيها برشة دمغجة متاع قلة حياء كيما قلت... وعاملين فيها متناسيين انو الحوار ما يلزم في شيء قبل مخرجاتو... وأنهم عملوه قبل مع نفس الاطراف السياسية الي يمكن يرفضو الحوار معاهم اليوم... وانو الحوار موش موقف سياسي مشترك...وانو مخرجات الحوار في صورة الإتفاق عليها هي فقط الموقف السياسي المشترك…
فبحيث...هاذم مسبقا نقوللهم على الحساب... ربي يجبرلكم. ومسكينة تونس بيكم... قداش حسابات متاع نفاق خربت البلاد ... وهذا البيان للإعلام…
