موش أمضيتوا باسم 100 ألف أستاذ على اتفاقية تهبّل باعتباركم طليعة النضال النقابي المسلّح بوعي سياسي نوعي يفهم في الاستراتيجي والتكتيكي؟ وموش بمقتضى هالاتفاقية باش تقعدوا بطالة ست سنوات كاملة (ثلاثة سنين في انتظار دخول الاتفاقية حيز التنفيذ وثلاثة سنين أخرين للتنفيذ)؟
وموش قلتولنا أنو المبرر الرهيب والمنطقي والابستيمولوجي اللي خلاكم تسكّروا حانوت العمل النقابي بالبلوكيس وتطيّشوا المفاتح لعام 2029.. هو وجود الخوانجية (الغنوشي) والدولة العميقة (كمال اللطيف) في الحبس؟.. بمعنى أنكم حققتم الهدف الاستراتيجي الوطني الكبير والأولى من كل مطلب جزئي قطاعي وضحّيتوا بمطالب الأساتذة تكتيكيا ؟..
وبمعنى أن كل توتير للمناخ الاجتماعي باسم النضال النقابي يصب موضوعيا في صالح الغنوشي واللطيف؟.. وبمعنى أن الوطنية تقتضي أنو الأساتذة يموتوا بالشر ما دام الغنوشي واللطيف باش يموتوا في الحبس ؟
موش هكا قلتوا لهياكلكم النقابية/الحزبية. وللقواعد الأستاذية المغلوبة على أمرها..؟ باهي آنا شخصيا اقتنعت بهذه الآراء العبقرية. أما اللي مقلقني آش باش تقعدوا تعملوا من هنا لعام 29؟
عاد قلت نقترح عليكم تزيدوا تثبتوا مساندتكم لمسار 25 وتستغلوا وقت تفرّغكم/فراغكم النقابي الطويل بعدما التزمتم بصفر مطالب وتحركات.. وتبعثوا شركة أهلية لصناعة الزكرة.
الزكرة آلة موسيقية تراثية مهددة بالانقراض.. وسهلة التعلم خاطرها ما تطلّب كان احناك كبار.. ونحتاجوها فعلا في الأعياد الوطنية القادمة.
نتصور في بالكم عاد بالمرسوم اللي أقرّ عيد سنوي جديد اسمو "عيد الزكر المشمّعة".
تبا.