توا وقت عرفهم التاريخي المخضرم برشة مرات... البجبوج وما أدراك... إلي جابهم وقراهم السياسية...وخرجهم من العدم...وقراهم دروس بسيطة جدا جدا...ولكنهم لم يستوعبوها...او تخلو عنها وقت لقاو رواحهم في السلطة...ياخي ضربتهم الدعوة المفرح...ونفخو صدورهم…
موش أول درس قراهولهم انو "السياسة بنتائجها"؟ تي حتى أنا إلي من اليسار تعلمتو... (برا عاد يا مطلغين ويا مدوعشين قولو يميني خليني نزيد نضحك...هه)..
الجماعة الي يستشير فيهم يوسف...وقت لقاو رواحهم في السلطة نساو الدريس الصغرون...وهو ساهل ماهل...معناه ما تتعماش بالسلطة...وقبل ما تاخو قرار سياسي...شوف شنية نتائجو الممكنة وقيس وغيس موش ما تتبلنطاش...واذا كان نتاءجو غير مضمونة لوح عليك... وشوف غيرو…
لكن الجماعة دخلو يدزو في صدوراتهم...قالك قال شنوا احنا شباب وعصريين وفاهمين كل شيء في الدنيا... وعنا ديبلومات... ونعرفو كيفاش نخدمو...ههه ياخي دخلو الغشير المسكين في حيط من الأسمنت المسلح...موش حتى من الياجور…
أول تزليطة عملوها... قالو باش ناقفو لتونس...ياخي وقفو عليها تونس ...وبعد وقفت عليهم…
ثاني تزليطة عملوها...قالو باش نحاربو الفساد...وحاولو يصفيو خصومهم على السلطة... وخرجو مظاهرات go دجو...ياخي زاد تعمم الفساد...وبعد مدة دجو يلقى روح يعوم في الناشح…
ثالث تزليطة عملوها...عاداو اتحاد الشغل...ياخي رجعو بالتوالي...بالتوالي...وكلاوها في عظامهم... الخ...من التزليطات السياسية...وهي كثيرة..
اما التزليطات الي تضحك برشة...وما تجيش حتى متاع مفرخ متاع سياسة...هي هاذي... وقت شافو الي خصمهم الباندي مولى نسمة طالع في الصونداج...وفي عوض يدفعوه في الخطايا ويعاونو بيها الميزانية...ويجبروه على احترام قوانين الدولة بذكاء وحرفية ...الجماعة نقزو طول وسكرولو القناة!!!
وفوق لكل هبطولو جيش من قوات الأمن باش يقصلو جرد كابل... ههه.. سكرولو القناة جملة يا بوقلب... إلى يتفرجو فيها ملاين التوانسة...ومنظمين وقتهم على مسلسلاتها...يعني ما يزيهمش الجوع إلي متسببين ليهم فيه ولي عامل فيها مولى القناة يحارب فيه...اما حتى أوقات التسلية إلي ينساو فيها الفقر يحبو يمنعوهم منها!!!
ياخي عايشين في تونس هاذم ولا انبورتي؟
وزيد رجعوه بطل وضحية استبداد ....وهو طبعا استغل الفرصة...وليدها ودولابو...ياخي زادو في شعبيتو ... يا والله أحوال.... وبعد وقت ما لقاو بيها وين...قامو يحبو يترفكو القانون الانتخابي جملة...لاقصاءو من الرئاسية...والجماعة شادين صحيح...ههه
ياخي البهايم هاذم موش فايقين انو اذا اقصاووه من الرئاسية باش تزيد شعبيتو كضحية؟ وهو موش باش يقعد ساكت؟
ياخي ما يعرفوش أنهم ما ينجموش يعرضولو ويمنعوه وقت يقدم قوائم تشريعية باسمو او باسم خليل...ويتحصل على اغلبية في المجلس (وهو الحزب الأول في الصونداج وبعيد على لخرين وهو موش حتى عامل حزب)!!!...
ياخي ما يعرفوش انو في الحالة هاذي ينجم يولي رئيس حكومة (كيف برلوسكوني في ايطاليا في عصرو)...وما ينجموش يمنعوه...وتصبح السلطة الفعلية بين ايديه...موش فاهمين الخطورة هاذي؟
ياخي ما يعرفوش انو وقتها ينجم يتشمت فيهم وينقيهم بالواحد بالواحد؟ وما يلقاوش معاهم رأي عام...لأنهم جوعو التوانسة وعاثو فيها فسادا...إلا بعض الحقوقيين وقت تكون المحاكمة غير عادلة؟ ويدخلهم للحبوسات بملفات فساد...وحتى لوكان موش موجودة... الفصل 96 من المجلة الجنائية يكون خدام؟
ياخي ما يعرفوش أنهم وقتها يكونو ذيتوها برشة مع باندي...وقت يمنعوه من تحقيق أناه المتورم في أن يصبح رئيس تونس ولو بدون صلاحيات فعلية؟ والباندية ما ينساوش؟
ملخر؟
توا بربي شكونهم الي يستشير فيهم الشاهد هذا؟
لوكان جاء يفهم شوية في السياسة...راهو طردهم لكلهم سيديجا...وقفز بروحو...وخرج للشعب وعمل خطاب غلطوني...ههه