ولو أني ما تهتمش ياسر بالتصريحات متاع برشة سياسيين في تونس على خاطر ما نلقى ما نقول في العديد مالاحيان. لكن لقيت جزء من حوار زهير المغزاوي في الراديو وقتلّي الصحفية سئلتّو على "حكومة الوحدة الوطنية".
الإجابة متاعو كانت كالاتي:
"فمّه نوعين متاع حكومات وحدة وطنية"
وهنا بالضبط ارتفع منسوب الاهتمام والتركيز متاعي وزدت شوية في الصوت متاع التلفون وكنت نظن انو باش يرجع الى الادبيات القومية والعروبية متاعو وباش يبدا يصنّف في الائتلافات والتحالفات العضوية والموضوعية متاع عصمت سيف ألدولة في جزء "الأسلوب" متاع نظرية الثورة العربية متاعو والنطاقات متاعها والتحديات في تونس…
إذا بيه قال:
"فمّه نوع متاع اليأس الفخفاخ ونوع متاع النهضة" !
موش لازم نحكيلكم على الخيبة والاشمئزاز خاصة لما تجي من واحد الحزب متاعو في الحكومة! وما نعرفش عندو نوع ثالث متاع ائتلاف واللا قاعد في "الفيراج"!
أنا نحمّل المسؤولية لكل واحد يعتبر نفسو إعلامي واللا صحفي باش يفتح المجال لكل واحد يساهم في التبلد الذهني والانحدار بالذوق العام وتردي مستوى الخطاب.