منذ يومين تفرجت في العبيريرة...موش عوايدي... تعاود في نفس الديسكو المكسر... لكن خاطر عارف الحصة بش يكون فيها برهان... لكن نلقا برشة ناس من بعد في التعليقات عجبتهم مرافعتها ضد الشيخ...يا والله أحوال...
وعجبهم زادة... السطو على تاريخ بورقيبة الي انقلب عليه وحطو بن علي في الإقامة الجبرية ومنع عليه الزيارة حتى للي تخلص منو بالموت... وقت المساجين عندهم الحق في الزيارة... ووقت هوما يعرفو انها كانت وقتها من بقعة لبقعة تزغرط لبن علي صانع "التغيير" (الانقلاب على بورقيبة) ... بن علي إلي ما كيفو حد.... حتى بورقيبة ههه..
ويعرفو أنها وقتها ما تذكرش إسم بورقيبة كمؤسس للدولة... ولاً حتى حست بيه من ناحية إنسانية يا بوڨلب...لا شفقة لا رحمة...يا والله أحوالهم مرة أخرى... فارينة مسوسة وهاظاكهو. كبار الحومة... ولي آنا وغيري برشة منهم... راهم ما زالو حيين وما ينساوش... وربي يطول في عمرهم…
وما دامهم موجودين.. ما ينجموش ايبيضوها بفارينتهم المسوسة العبيريرة.. عاد العبيريرة عملت مرافعة في السياسة...وطبعا كيف العادة والعوايد خاوية من الدفوعات والحجج والمقترحات الجدية البديلة...كرئيسة حزب طارح روحو بديل... تجي تحل الصرة ما تلقاش حتى خيط... حصة طويلة وهي اتدمغج... لا برنامج اقتصادي واجتماعي يخرج البلاد من الازمة... ولا كيفاش تعمل التنمية والتشغيل...ولا كيفاش تخلص البلاد من المديونية الي تعرقل النمو.. وحتى كلمة على الفساد...الخ.
وتتحدث على دستور جديد وما تقولش شنوا النظام السياسي البديل الي فيه.. وانا نعرف انو فاشستي متاع حكم فردي كيف متاع بن علي…
وحتى كلمة كيفاش تشوف تونس مستقبلا وقت الناس التاعبة تلوج على أمل في المستقبل .. الخ... والو.. حتى شيئ... نيات...ظلمة الطفلة... كان الشعارات.. شعارات ودمغجة وشعبوية ...في مرافعة منمقة متاع محامي طالب عدم سماع الدعوى وقت هو يعرف أن الإدانة ثابتة.. متعودين علي يعملوها منا أحنا المحامين.. . ههههههه
وبما أني محامي ونفهم في المرافعات الخاوية والبيدون..وبما أني متعود على مثلها في المحاكم ...وهي لإبهار الجمهور موش لإقناع المحكمة... عاد آنا ما لفت نظري في الشارابيا متاع العبيريرة كان جانب واحد...وهو وجود برهان بسيس في الحصة بش يسألها...وثما معطيات يمكن تتقال..
وتقالت... خاطر وقت يتقابلو زوز تجمعين ويجبدو الماضي...تفهم حوايج كانت فالتة عليك وقت بن علي... خصوصا وقت تعرف أنها باش تاكل بعضها بيناتهم وهذكا إلى حصل.. قاطعو بعضهم... وريشو بعضهم..وخرج الكلام عفوي وعن حنق.. حتى للي مقدمة الحصة قصت ومشات لفاصل كيف ما يقولو...
لكن فهمت أن العبيريرة... كان عرفها المباشر الي تأخذ منو التعليمات...هو الغرياني الأمين العام للتجمع الاخير والمستشار الحالي للغتَنوشي...ههههههه... وما كانتش مقربة من بن علي...
وفهمت أن برهان البسبوس الناطق الإعلامي في التلافز في بقعة بن علي...كان ياخذ تعليماتو من القصر...ومقرب من بن علي.. وهي الي قالتو... وأنو كان مقرب أكثر منها...وقالتها وكأنها غايرة منو... و كأنها تكنلو نوع من الحسد والحقد بسببها..ههههههه…
لكن... وهذا المهم... هو من جانبو بخبثو... حطها في الزاوية... للي فكرتو انو قاعد يشاغب فيها خاطرو يخلص …
وقت البسبوس جبدلها علاش ما رحمتش على شهداء الثورة...وقاللها لوكان موش هوما وموش الثورة والحرية... راكي اليوم حتى شيئ... خاطر عرفك في الحزب ما كانش راضي عليك...ولوكان قعد بن علي راكي اليوم حتى شيئ... و قاللها بما معناه.. راكي لو كان موش الثورة... والحرية... راكي ما عملتش حزب... وماكش زعيمة حزب اليوم... يعني نكرة....
وسألها خاصة علاش ما تحبش تعمل مراجعة... وتقول ان في نظام بن علي ما ثماش حريات على النمط الليبرالي الي مكنتك اليوم بش تكون عندك حزب...وتكون عندك كتلة في المجلس... وطرف في المشهد السياسي...وتعترف بمزايا الثورة عليك...
ما جاوبتوش العبيريرة... تهربت وحنقت عليه...وهذا شيئ طبيعي بما انها موش مستعرفة بمزايا الثورة عليها وبالشهداء والجرحى الي بفضلهم أصبحت على ما هي عليه اليوم... وتهربت منو بتساءل... شهداء متاع شنوا؟ وعاودتها برشة مرات... متاع شنوا؟ كلام ما يخرج كان من كابينة...
ولي عجبني في البسبوس اول مرة في حياتي...خاطر ما نتفرجش فيه... أنو لمحلها أنها إذا كان ما تعترفش بهذا... مالا شنوا رؤيتها للمستقبل؟ ما جاوبتش...وهذا للي يحب يفهم معروف...العبيريرة تحضرلكم في نظام فاشستي... بخطاب شعبوي...وتضرب عصفورين بحجرة...تصفي حساباتها مع برشة ناس... وتربح وين خسر بن علي.. ومن أنذر...ودليلكم ملك…
وزيد راهي موش باش تحل الأزمة الاجتماعية والإقتصادية...ما عندهاش برنامج جدي...بل يمكن بش تزيد تعكرها... لوكان لا قدر الله تربح الإنتخابات.... وانبهكم... كل واحد من القفافة يتحمل مسؤولياتو...ما تعاودوناش غلطتكم مع بن علي...وتعاونوها باش تهز البلاد للفينڨة...
لكن المهم أكثر في كل هذا.... ان في تونس حصلت ثورة...وحصلت حرية ومكاسب دستورية... تصورو حتى العبيريرة استفادت منها!!! وقت ما كانت حتى شيئ وقت بن علي... وبشهادة البسبوس... وهي مكاسب يمكن البناء عليها... بالنظر إلى الأمام.. ولا للخلف... كيف ما يعملو الدواعش...
وعملا بمقولة ذراعك يا علاف...هكاكا في السياسة... بخلق ميزان قوى جديد...وتوازن سياسي مع اليمين الحاكم... وموش بالعبيريرة...وموش بالفارينة المسوسة ليها...
الغريب أنك ما زلت تقرا لديمقرلطيين… وتقدميين… مبهورين بقشور مرافعة العبيريرة… في عوض يثبتو في محتواه ومراميه… وهي بدبهيات ومن قبيل الابجديات في السياسة… ويتزايدو عليك يا بوڨلب!!! يعاونو فيها باش تهز البلاد للتهلكة أكثر ملي هي عليه توا… لا نمو اقتصادي ولا تشغيل معاها… وفوق لكل تقضي على الحريات المكتسبة… يا والله أحوالهم…هاذم… ما بقالي كان نقوللهم ربي يفتح عليهم…وينورهم…حجة العقل ما عادش تنفع معاهم…
أفكارهم متحجرة في الميضوع… تقولش عليهم يتحولو لدواعش وقت تجبد على العبيريرة…