على أساس وقت بن علي... كانت تنجم تحل فمها وتعبر ضد سياسة الحاكم...كيف اليوم... وعلى أساس وقتها ما كانش ثمة جرائم قتل وسرقات وفساد…
وما كانتش ثمة كياسات مكسرة تتسبب في حوادث قاتلة... وسيارات تسقط في برك ماء وقت تصب المطر وفياضانات ويغرقو فيها الناس... وما كانش ثمة فقر وميزيرية ومعوزبن…
وما كانش ثمة مناطق مهمشة وتونس لكلها كانت تشبه لدواير قصر قرطاج الي تسكن فيها...وما كانش ثمة بلايك...وما كانش ثمة أموال 2626 "إعانات" فرضها بن علي على المواطنين تحت التهديد المقنع... نصفها يسرقوها الصحاح في السلطة وأعضاء الشعب... الخ…
وقتها لوكان عملتها وعبرت كيف توا تعمل... راهم قصو عليها العلفة... كان ما كلاتش كفوف وطريحة نباش القبور موش ما نقولش تعذيب... وكرفتوها ومرمدوها في حبس منوبة حتى ترجع تشد الصف..
ومانيش نحكي على فساد الطرابلسية وبن علي.. والتعذيب والمحاكمات الجائرة ومنع حرية الاجتماع والتنظيم والتظاهر الخ ... الحكايات هاذي ماكانتش تعنيها... وتوا مستفادة منها كيف الي ينتفع بعرق جبين غيرو ويسبو ...وتخدم بيها في المشاريع السياسية الشعبوية والفاشستية...
قلة حياء...و قلة معروف... الرهوط هاذم ترباو في المستنقع المنتن متاع الاستبداد والفساد...وما يحبوش يخرجو منو…