هوما اليوم أحرار يقولو إلي يحبو... لكن قبل ماكانوش..والزلقة كانت بفلقة... والفلقة كانت فلقة وفلقة... فلقة بتعليق في وضع الروتي ثم الإقامة في دار الخالة... وفلقة بقطع الأرزاق... طبعا هوما وقت يقولو قبل كنا خير...ما يقصدوش الحريات وحرية التعبير... لكن الاسترزاق... ويا من وراني آش كانو وقتها...آنا شخصيا نعرف برشة منهم آش كانو...وأنتم زادة راكم تعرفوا برشة…
عاد آنا نعرف إلى قود بجارو على أساس أنو خوانجي خاطر عاون أطفال خوانجي مسجون من الجيران تقطعت عليهم الشهرية...وبعد ما وقفوه وعذبوه وسجنوه وجوعو أولادو زادة هو...القواد هذا خذى رخصة تاكسي وهو موظف ومرتو أستاذة وعندو سيارة شعبية ودارو ملك... ونعرف إلي كان لاباس عليه وكان عضو شعبة... وزاد دبرها بتوزيع 2626..
ونعرف الي دخل لشعبة التجمع باش يخدم أولادو... وبعد الثورة نلقاه مناضل ضد الإستبداد...بش ما يقولوش عليه تجمعي…
ونعرف إلي كان يُعبر على الناس...خاطرو من شوشوات الطرابلسية...ما يستعرفش بالقوانين في آفارياتو... ويقلب ويشقلب في الناس في أرزاقهم وهو محمي..وحتى البوليسية متاع الطريق كانو ما يدوروش بيه ويتهربو من أذاه.. ونعرف إلي كان يحلڨ في لجنة التنسيق والولاية...ويصب في الصبة بزملاءه في العمل.. مقابل تسهيل أمورو وأفارياتو…
ونعرف الثقفوت الي كانو يعملو في الفارينة لصانع التغيير...في الندوات والإعلام... وبعد عملو فيها مساندين للثورة... وتوا رجعو يسبو فيها... ويعملو في الفارينة لعبيريرة بن علي.. وفي السياسة نعرف برشة برشة...راجعو مثلا صفحاتهم الفايسبوكية... تنطق وحدها...
كانو ضد الإخوان وقت بن علي وحتى مع استئصالهم جملة من المجتمع... ووقت الترويكا كانو ضدهم خاطر الإخوان استغلوا مفاصل الدولة والآفاريات لصالحهم وطفاوهم وما وزعوش شوية فتات لغيرهم ...وبعد التحقوا بالسبسي والنداء وديما من أجل المنافع وموش لمشروع سياسي...خاطر وقت السبسي عمل توافق في الحكم مع الإخوان... برروه التوافق وفيهم حتى شكون مجدو وعمل الفارينة لبدعة "تونس لا تحكم إلا بالتوافق" وهات من هاك اللاوي…
وتوا وقت طلعت العبيريرة في الصونداج على أساس سبان الشيخ والإخوان كيف كان النداء وقت الترويكا...وديما بدون مشروع سياسي.. رجعوا يسبوا في الإخوان ويعملوا في الفارينة للعبيريرة ... وما عادش عندهم تونس "لا تحكم إلا بالتوافق"....وإنما تونس لا تحكم إلا بالاستئصال... رجعولها هههه... طيحو على أم البوية في تغيير الألوان يا بوڨلب...هوما ووين موجودة اللحمة في صحن الكسكي...
الرهوط هاذم...ما اكتسبوش الحد الأدنى من قيم المواطنة في طاست أمخاخهم... رغم مرور عشرة سنين عن الثورة الي كارهم تعلموها خلالها... الرهوط هاذم وقت يقولو قبل كنا خير... يمشيش في بالكم يفكرو في البلاد والصالح العام ومصلحة الشعب والمواطنين لخرين؟ مستحيل...موش في سبرهم الحكايات هاذي... وعمرهم ما يفكرو فيها... هاذم ما يفكرو كان في أرواحهم...نفسي نفسي وألله لا ترحم لخرين..
كانو بلاش كرامة... مدنكسين ريوسهم للإستبداد كان موش مساندينو ويُحركو فيه ... لكن كانو مقابل ذلك يسترزقو من فتات الفساد متاعو... وصحيح هوما قبل كانو خير... هوما كيما يشوفو الدنيا... وما كذبوش... واليوم المساكين طايحة بيهم وذن القفة…
الجماعة بركة يحبو يرجعو يسترزقو كيف قبل... وطز في الكرامة إلي اكتسبوها بالثورة... وموش مهم إذا كان غرفو من قفة الفساد...