اش يعمل في الحبس وعلاش موجود حتى لتوة فيه موش وقفوه على خاطر ملف شكري بلعيد ؟ تي هاو عرفنا اشكون قتل بلعيد ونفذ تي هاو صدر الحكم في قضية شكري بلعيد موش هاذم اللي باشر البشير العكرمي الأبحاث والاستقراءات في القضية وتوصل لتورطهم في عملية الاغتيال بالحجة والدليل، يطلعشي غالط هو زادة فيهم؟
تقريبا هذي هي الأسئلة اللي تطرحت من طرف العديد من المحامين، وبعض الاعلاميين وبعض زملاء سي بشير على صفحاتهم اللي على الاقل عندنا 11 سنة واحنا نتبعوا في ملف اغتيال الشهيد شكري بلعيد.
على كل الدائرة الجنائية بالمحكمة الابتدائية بتونس في ساعة متأخرة نهار الثلاثاء الفايتة حكمت بادانة العديد من المتهمين في قضية اغتيال الشهيد شكري بلعيد وعرفنا على الاقل الأشخاص المتورطين في ملف الاغتيال واللي وقع تسميتهم بملف مجموعة التنفيذ (هذا مصطلح جديد وقع ابتكارو ماسمعناش بيه قبل ) هالمجموعة هذي حبيت نذكركم اللي توصلولها وهذا للتاريخ زوز اطراف الطرف الاول الإدارة الفرعية للقضايا الاجرامية اللي تعهدت بالموضوع بناءا على قرار فتح بحث تحقيقي من قبل النيابة العمومية في تلك الفترة واسناد انابة قضائية من قبل قاضي التحقيق القاضي البشير العكرمي لفائدة الفرقة اللي خدمت على الموضوع صباحا مساءا. والثاني هو القاضي البشير العكرمي الي يقولوا ويروجوا جابوه خصيصا للقضية باش يتلاعب بالاجراءات واللي سعا لملاحقة كل المتورطين في ملف الاغتيال وخذا قرار في ختم البحث اللي تضمن تقريبا ل400 صفحة او مايزيد، هو موش مهم عدد الصفحات بل المهم انو ماتضمنو القرار من الاعمال الاستقرائية سماعات اللي قام بيها البشير العكرمي واختبارات فنية وقرارات اطلاع ومراسلات ومكاتبات واضافة ملفات تحقيقية اخرى لملف القضية، كيفية التخطيط والتمويل في تنفيذ الجريمة اشكون يقف وراء ذلك.
الملفت للانتباه وهذا باش يتسجل للتاريخ القضائي بخصوص ملف اغتيال شكري بلعيد انو مجمل المتهمين في القضية واللي عددهم تقريبا 24 واللي توصل البشير العكرمي من خلال قرار ختم البحث واعتبر انهم متورطين في عملية الاغتيال وايدت قرارو دائرة الاتهام ومحكمة التعقيب في هذا السياق وتعهدت بيه الدائرة الجنائية هوما نفسهم دون زيادة او نقصان اللي حكمت المحكمة عليهم في القضية النهار الثلاثاء ليلا بالإدانة ،
في حديثي مع سي بشير البارحة في زيارتي المعتادة ليه بخصوص هذا الحكم يقلي انو هالملف هذا قعد 9 تسعة سنين اي منذ 2015 وهو منشور أمام الدائرة على اساس انو كل مرة باش تتضاف فيه معطيات تنجم تغير مسار القضية ولكن شي ماتبدل لا في التصريحات ولا في الاعمال ولا حتى شي وهذا على الاقل خلى انو الدائرة اقتنعت بسلامة جميع الاعمال المجراة من قبله في القضية بجميع مراحلها الاستقرائية وماثماش حتى شي جديد ينجم ينضاف وصدرت حكمها بالإدانة في حقهم بل اكثر من ذلك حكمت بعدم سماع الدعوى في حق بعض المتهمين اللي سبق وانو البشير العكرمي حفظ في حقهم لسبق التعهد ونقضت دائرة الاتهام ذلك والمحكمة هاو زادا ايدت الحكم في حقهم بانقراض الدعوى العمومية بموجب اتصال القضاء.
الحاجة ثانية انو ياكدلي انو كل ما يتعلق بالجزئيات المرتبطة بعملية الاغتيال من تخطيط وتمويل وتنفيذ موجودة بقرار ختم البحث اللي اعتمدتو المحكمة بدورها وهذا قليل انو يتحدثو عليه.
مالزمناش ننساو اللي البشير العكرمي قرر بموافقة النيابة العمومية تفكيك الملف اللي هي آلية مسموح بها وقانونية باعتراف الجميع موش كيما يقول البعض باش يشتت الملف ويذهب شيرتو ولكن لتتبع كل من تثبت ادانته لاحقا في اغتيال الشهيد شكري بلعيد واللي حسب علمي مازال الملف يراوح مكانه حتى بعد خروج سي بشير من التحقيق ومن وكالة الجمهورية والله اعلم ان أتى بجديد في ملف الاغتيال ام لا وهل تضمن معطيات جديدة ؟.
ملخص الحديث اللي ينجم يطول لسنوات ،
البشير العكرمي اللي خدم الخدمة الكل على مدى السنوات السابقة موقوف منذ سنة تقريبا على ذمة مجموعة من القضايا اللي هي موجودة على مستوى القطب القضائي لمكافحة الإرهاب وتتعلق بخصوص الأعمال القضائية اللي قام بيها في ملف اغتيال شكري بلعيد. يعني بربي فهموني نصدرو حكم على المتهمين اللي بشير توصل إلى تورطهم في عملية الاغتيال وبالخدمة اللي خدمها هو في ملف الاغتيال ونوقفوه وزيد نقولولو اللي انتي تلاعبت بالاجراءات و دلست ، حبيت تتستر على مجرمين اي كيفاش فسرولنا اكهو معنتها اللي حكموا عليهم الكل في ملف القضية وادانوهم بعقوبات سجنية تصل الإعدام و120 سنة سجن هاذم الكل بشير تلاعب بالاجراءات في الملف؟؟ اضافتش الدائرة عنصر جديد في الملف او لأبحاث اللي قام بيها البشير العكرمي سؤال لم أجد له جوابا بهذا الخصوص مالا على شنوة نحاسبو في بشير اللي خدمتو اعتبرتها المحكمة صحيحة علاش موقوف إلى حد الآن؟ الشخص اللي سمعو كشاهد موجود في قائمة المتهمين في القضية المفككة، السيارة اللي يقولو موش محجوزة طلعت محجوزة بتأكيد دائرة الاتهام( وقد كان الحجز الصوري طبقا للقانون) ، النتائج الفنية والاختبارات على السيارة و الحاسوب موجودة بالملف ومظافة به وهذي كل المعطيات والاعمال كانت سندا في صدور الاحكام القاضية بإدانة مجمل المتهمين في القضية استنادا للأعمال القضائية اللي قام بيها القاضي البشير العكرمي.
اش يعمل في الحبس وعلاش موجود في الحبس وبخصوص ماذا ؟:اسالو اللي عندهم الملفات متاع سي بشير اللي قاعدين يسألو فيه على الأعمال القضائية متاعو في الملف بعد 11 سنة وبعد ما حكمت الدائرة بتركيبتها المتكونة من 5 اعضاء بالإدانة على مجمل المتهمين اللي بشير اعتبرهم مذنبين والمحكمة كذلك.
في النهاية الثابت ان الوصول للحقيقة في ملف اغتيال الشهيد شكري بلعيد هو البحث عن حقيقة اخرى غير الحقيقة القضائية اللي توصللها البشير العكرمي في هذا الملف كيفها كيف الحقيقة اللي توصللها في ملف أحداث متحف باردو ونزل امباريال سوسة بمتابعة دولية وكرمو الراجل واحترموه وعرفوا قدرو وقيمتو وحرفيتو في مجال مكافحة الإرهاب واحنا كرمناه واحترمناه كذلك بحطانوا في الحبس من قبل البعض من زملاءه بمقتضى مجموعة من بطاقات ايداع في ملف ظهرت الحقيقة القضائية نهار الثلاثاء ليلا بحكم من المحكمة واللي استندت فيه لأعمال القاضي البشير العكرمي المسجون دون موجب... للحديث بقية ان طال العمر.