توة مش نحكي كانسان عديت عمري وسط الكيران. ونعرف الي كلامي موش مش يعجب برشة ناس.
ليوم لازم نقولوا مع بعضنا يزي من استهبال الشعب ونقولوا حقيقة المشكل في حوادث les poids lourds في تونس الي أصبحت معضلة وكل عام تصيرلنا كارثة. ولكن نهيجو ونميجوا والصحيح ميقولوا حد...؛
الشاحنات الثقيلة او الحافلات عندهم جهاز فرملة بالهواء المضغوط والجهاز هذا قد مهوا فعّال لكن في اي لحظة ينجم يطرء عليه خلل وينجم تصيرلنا كارثة.
الشاحنات والحافلات مجهزة بمخفضات السرعة يتسماو Ralentisseurs او frein moteur في أغلب الاحيان كيف يعدموا ميصلحهم حد لان يعتبروهم زايدين او كماليات… وحتى في الفحص الفني ميراقبوهمش.
التكوين متع السواق ناقص برشة واغلب الجدد متعلمين في مدارس خاصة وواخذين البرمي بالعضم.
لازم يرجع مراكز تكوين المهني في السياقة للعمل. ولازم إعادة هيكلت مراكز الفحص الفني باش ميقبلوش حافلة او شاحنة frein moteur متاعها ميخدمش… " الأعوان قليل الي يعرفهم "…
ليوم السيد الوزير متع التجهيز رما الكورة وقال شوفوا عجلة بركة قعدة تشد… لكن انا نقلك يا سيد الوزير الي بعد نزول في منحدر باكثر من 15٪ وعلى مسافة 400 متر مفمة حتى حافلة ralentisseur متاعها ميخدمش تقعد لباس و حتى عجلة متقعد تشد … في الحالة هذي الكارثة متوقعة بنسبة 70% في ميخص الحافلات متع الجهويات الي كل نهار ماشيين جايين من غادي و ديمة لباس هظوكم مجهزون بعلب سرعة اتوماتيكية و ralentisseur متاعهم intégré في علب السرعة و صعيب يعدموا.
ليوم لازم نشوفوا حل للشركات الكراء الصغيرة الي تخدم من غير جواز عبور ويشريو في الكيران على اساس لنقل العملة. ونهار الأحد يكسروا السوق على الوكلات الصحاح…
إذا ليوم مناخذوش العبرة وتسمعوا اهل القطاع كل عام مش تصيرلنا مصيبة… وزارة التجهيز لازم تخرجلنا خريطة فيها المنحدرات الي تتجاوز 15٪ وتمنع عليها الشاحنات الثقيلة او تلقى حل في التخفيف من المنحدر هذي امورهم.
اما ليوم تقلي هاو مش نعمل قنطرة ب 200 مليار هذا ذر رماد على العيون ومعندوا حتى فايدة لان الحادث ممكن يصير قبل القنطرة بخمسين ميتروا او بعد القنطرة…
لزم إعادة هيكلة السواق ورسكلتهم وتوعيتهم خاصة الشباب ونفسرولهم الي الحافلة عبارة على قنبلة موقوتة وان هو مسؤل على أرواح بشر معاه راكبين او معاه في الكياس. لزم يفهم انوا قد مسياقة الحافلة ساهل وميقلقش وكل شيئ اتوماتيك ولكن انا حاشتي بيك في الثلاثين ثانية الي كل شيئ يتبدل وتصبح الكارثة لا قدر الله قريبة وقتها انتي خدمتك أنك تنقذ العباد الي معاك…