في ما يخص اللقاح: نكيفوا رواحنا صحيا و عمليا و اقتصاديا إلى أن يأتي ما يخالف ذلك

في ما يخص ال vaccin الجديد متاع العملاق الأمريكي Pfizer بالشراكة مع BioNtech .. صحيح خبر باهي ويفرح إنه Pfizer قالو انه كان ناجع عند 90 %، أما حسب رأيي الخبر لازم التعامل معه باحتراز لعدة اعتبارات:

1/ ال vaccin هذا بتكنولوجيا جديدة حتى مرة لا تجربت على vaccin humain مقارنة ب les autres vaccins كيما الvaccin de la grippe، ولا متاع ال polio الخ ال vaccin هذا عبارة على معلومة جينية sous forme d'ARN messager إلي باش يبرمج لصنع une protéine de surface متاع ال virus، و من غادي تنطلق la réponse immunitaire متاع جسم الإنسان ... معناها تقنية جديدة à contrôler...

2/ اPfizer مزال ما حكاش les anticorps قداش باش يعطيو immunité للبدن (3 أشهر، 6 ...) ، النتائج إلي تم نشرها قليلة و مازلنا ما نعرفوش مدى فاعليته، و مدى المامه بال les souches mutées الكل إلي ينجموا يظهروا...

3/ أهم حاجة حسب رأيي و أكبر تحدي لوجستي : ال conservation du vaccin … ! حسب المعطيات المتوفرة من Pfizer، ال vaccin بحكم مصنوع à la base d'ARN messager ياسر fragile ويموت فيسع، هذا علاش وجوبا لازمو ال transport والحفظ متاعو يكون في درجة حرارة 70 ولا 80 درجة تحت الصفر (اي -80 degrés) … معناها كل صيدلية ولا مستشفى متوفر فيها ال vaccin لازم يبدأ عندها congélateur à températures ultra-basses توصل الثمانين درجة تحت الصفر … ال congélateur من نوع هذا توا اثمانه في السوق من 10 ملاين وانت ماشي (ويمكن برشا تزيد تغلى برشا خاطر طلب عالمي عليها …). معناها الدولة كان معملة على vaccin Pfizer تبدى تشري من توا، شكون ومنين باش تشري frigidaire ب 10 ملاين؟؟؟ (على فكرة، ال frigidaire العادي باهي برشا كي يوصل ل -20 درجة ال congélateur متاعو…).. ولا نستناو المنافسين لخرين كيف Astrazenica إلي ال vaccin متاعهم ما يستحقش هذا الكل… و الله أعلم

4/ أخيرا وليس آخرا :

باهي ال VacciGripp متاع ال Grippe في تونس وصلنا كان 170000 يضهرلي، و الدفعة الثانية قريب توفى (نحن أعوان الصحة ما لقحناش لتوا… ) و الصيدليات قلك باش يعطيوهم كل صيدلية 74 حقنة (حاجة تضحك، أما الله غالب واقع…). Par analogie أول حاجة Pfizer و BioNtech تعهدوا قالك كان يعطيونا les autorités ال OK, يوعدونا باش يحضروا 1,3 مليار حقنة من هنا لآخر 2021 (معناها عام آخر)، و هوما مازالوا ما خذاو ال OK متاع حتى دولة ولا autorité (FDA, HAS, EMA…)، مازالوا الكلو كلام، و زيدكم زيادة، الاتحاد الأوروبي باش يصحح معاهم contrat باش يشري 300 مليون حقنة.. معناها العالم الكل طالب حاجة مازالت موش مصنوعة أصلا … العرض والطلب هذا ما نجموش ناخذوا فيه حظنا بسهولة للأسف أحنا بلاد كيما تونس (ولا غيرنا مالبلدان) …

بيت القصيد : ال vaccin (وهاو قالهالنا الوزير اليوم)، في أحسن الحالات باش يوصل لتونس (و بكميات محدودة) في ماي ولا جوان، معناها 7 ولا 8 أشهرة أخرين، معناها نكونوا واقعيين، ال prévention و surtout ال bavette… نكيفوا رواحنا صحيا و عمليا و إقتصاديا إلى أن يأتي ما يخالف ذلك… و ربي يستر