بالله ذكروني… هالكلام ما ثماش آشكون قالوا بعد الانتخابات بالوعيد والتهديد؟ هو راهو وجيه ياسر… فاش قام كشف الحقيقة ؟ ومن 1955 ‼ قاللو التمكن من الأرشيف وللينا نلعبوا عاد ‼ إيه نعم عندنا ما نخبيو الدولة دولتنا ما مازال إلا نمكنو الدخلاء مالأمور الجدية خللي الهمج يتكشفو على اسرارنا كي اللي يطمس عينو بصبعو ‼
مانا قلنالكم ‘الكلها تعليمات المخلوع’ واحنا مأمورين… يا سيدي ما ثمة حتى وثيقة وهذا آخر الكلام ‼ تي خللي الناس ترقد متهنية مطمّنة والضحايا بغبينتهم… تي هانا سلّكناها مع شهداء وجرحى الثورة… لجنة تقصي الحقائق مثال يحتذى به : بالله ثماش اعلام جبد عليها وقعد يبربش كيفاش تخدم؟ ياخي جدّ عليكم عيناهم باش يخدموا؟ وشكون سأل على ميزانيتها ؟
تي ما هو للتو رئيسنا يأخذ أمانة الحقيقة والكرامة في يدو ويركّبلنا لجنة ويعين فيها اللي راضي عليهم واللي يهنيوه هو وصحابو ويرفعوا تقاريريهم كان له هو وحده ويبدلهم وقت اللي يراه صالح… علاش التوتّر والتشنج ؟
قاللك هيئة دستورية وضحايا تقدم ملفاتها وجلسات استماع علنية ونصوروها بالتلفزة مالفوق ‼
بجاه ربي خللي نسلكوها وطاح الكاف على ظله ويا ناس ما كان باس انشاء الله يرضى علينا التجمع… اما الملفات للتو المؤرخين يتلهاو بها وممكن تصبر حتى نصف قرن آخر ‼ علاش ها المرج الكل والبلاد واقفة ؟
تي برا اتهناو وما تخافوش تي آش هي الحكاية الكل؟ 50 الف ضحية تعذبوا شوية بعض كفوف وشوية تعليق وايامات ربطية ؟ تي ما هو كي البو اللي يربي في صغارو ‼ تي الكلهم كبروا ونساوا…
بالله كان جاوا في الجزائر 18 الف اختفاء قصري و200 الف قتيل؟ ياخي تونس تحسابوها السويد وإلا سويسرا ؟
قالو كشف الحقيقة… باش تكشفولنا اعوارنا وتخليونا فضيحة؟ تي بالكش جدت عليكم ؟ رانا عرب… هيبة الدولة اقوى من الحقيقة… وفي الآخر تي راهو ما عذبهم حد وما ظلمهم حد ما هم إلا كمشة خوانجية ارهابيين ندموا وحفنة شيوعيين متطرفين تابوا وشوية قومجية تهورو… علاش الاعتذار؟