مسكينة تونس والله، الفوضى الإعلامية و السياسية و الاجتماعية الي فيها، هي ما يغذي تدمير الثقة في الدولة، من 2012 إلى اليوم كل الحكومات تعرضت لهجمات ممنهجة بإستعمال كل الوسائل، الأخلاقية و اللااخلاقية منها، المهم أن من يعارض يدمر كل شيء في سبيل تدمير من يحكم، هذا حالنا من 2012 لليوم، هذه الوضعية لا يمكن أن تتواصل دون عواقب وخيمة سيدفع ثمنها الشعب حصريا، و سنندم حتما و ربي يقدر الخير...
ما دفعني لهذه الكلمات المتشائمة، عودة لوبانة اختفاء 873 مليون دينار من ميزانية الدولة لسنة 2013... قلت عودة، خاطر سبق حكينا على الموضوع هوني نهار 19 افريل 2016، يعني مباشرة بعد صدور تقرير دائرة الحسابات حول غلق ميزانية 2013 و الي فيه الحكاية متاع 873 مليون دينار ضائعة…
و قلت لوبانة، خاطر سبق و بيّنّا وقتها بالدليل هوني انو الحكاية لا علاقة لها بإخفاء اي مليم،و إنما بوثائق لم تقدم وفق الإجراءات المعمول بيها...
ربي يهدي
هاو إعادة للمقال الي كتبناه نهار 19 فيفري 2016:
870 مليار
صباح الخيرات تونس
كنّا باش نبداو الجمعة الجايّة، في تفصيل بعض ما جاء في تقرير غلق ميزانيّة الدّولة، لسنة 2013، و الي أصدراتو دائرة الحسابات مؤخّرا.... لكن، امام تفاقم الزّوبعة حول نقطة معيّنة في هالتّقرير، و المتعلقة بباقي مداخيل تخصيص اتصالات تونس، قرّرنا اليوم نفركو رمّانة الـ 870 مليار، الي أصبحت حديث الرّأي العام في تونس…
نبداو كالعادة بالسّاس، دائرة الحسابات، هي هيكل عمومي، مهمتو، مراقبة حسابات الدّولة، و حسابات كلّ المؤسسات التّابعة للدّولة... و من جملة الأعمال الرّقابيّة لهالدّائرة، مراقبة حسابات ميزانيّة الدّولة، بعد ما تتنفّد هالميزانيّة... للتّبسيط، قانون الماليّة 2013 مثلا، فيه تقديرات لمصاريف و مداخيل الدّولة التّونسية لعام 2013... و في أفريل 2015، وزارة الماليّة، عملت قانون اسمو، قانون غلق ميزانيّة 2013، و فيه، الأرقام الي صارت فعليّا عام 2013 مقارنة، بالتوقّعات الي كانت موجودة في قانون الماليّة 2013...
و قانون غلق الميزانيّة هذا، قبل ما يخرج، يمشي لدائرة الحسابات، الي تثبّت فيه بالتّفصيل، و تثبّت خاصّة، في احترام الإجراءات الإدارية، و القانونية، و قواعد المحاسبة، لمّا الدّولة صرفت ميزانيّة 2013... و دائرة الحسابات، راهي صارمة جدّا في تقييمها، يعني، تسمّي أي إخلال بالإجراءات، كبير و الا صغير ... و دائرة الحسابات راهي فخر لبلادنا هذي، المهم نفهمو كلامها فهم صحيح…
نتعدّاو للنّقطة الي فيها المشكل، تقرير دائرة الحسابات حكى عال870 مليار مرتين... مرّة أولى، في ملخّص الاستنتاجات متاع التّقرير، في الصّفحة عدد 10، و يقول حرفيّا:
"ويجدر التذكير، بأنّ عائدات فتح رأس مال شركة إتصالات تونس بنسبة 35 % في سنة 2006، كانت بمبلغ 3050 مليون دينار، علما، بأنّ المبلغ المتبقى من هذه العملية، يساوي 873 م.د، غير أنّ حساب سنة 2013، والوثائق المصاحبة له، لا يتضمّن مبالغ بهذا العنوان." ...نردّو بالنا هوني، راهو كي قال... " أنّ حساب سنة 2013، والوثائق المصاحبة له، لا يتضمّن مبالغ بهذا العنوان" ...
موش يقصد في الحساب الي محلول في البنك المركزي، يقصد في الحساب العام للدّولة... و الدّليل على كلامنا، هو انّو في المرّة الثّانية، الي تجبدت فيها النقطة هذي في التّقرير، و الي هي في تفاصيل التقرير في الصّفحة عدد 47... يقول حرفيّا.... "علما بأن المبلغ المتبقى من هذه العملية 873 مليون دينار، لم يتمّ إدراجه بالميـــــزااااااانيّة"... يعني الحكاية الكلّ، مجرّد قواعد إجرائيّة، و موش فلوس تبخرت...
دائرة الحسايات، تقول انّو ما أعطاوهاش وثائق، تورّي انّو المبلغ هذا موجود، لكن ما قالتش أنّو الفلوس تبخرت…
و هاو دليل اقوى، في الهامش متاع المرتين الي تجبد فيهم الموضوع في التّقرير، دائرة الحسابات، و لتأكيد كلامها، على أنّو بقاو 870 مليار من مداخيل خوصصة اتّصالات تونس، تستشهد بالتّقرير السّنوي للبنك المركزي لعام 2013، و الي فيه حسابات المركزي الكلّ، و الي مصادقين عليه دون تحفّظ، زوز خبراء محاسبين، هوما السّادة، شريف بن زينة و مراد قلّاتي....
و لمّا نمشيو للصّفحة 171، من تقرير البنك المركزي 2013، نلقاو هال870 مليار، موجودين، و في بلاصتهم...
نزيدكم، الفلوس متاع خوصصة اتّصالات تونس، جبدنا منهم زادا في 2014 لتدعيم الميزانيّة.... و عمّقنا البحث من جيهتنا، و جبدنا تقرير البنك المركزي 2014، و الي كيف كيف، فيه الحسابات المصادق عليها من طرف السّادة الخبراء المحاسبين الي سمّيناهم، و لمّا نمشيو للصّفحة 193، نلقاو أنّو الباقي من عائدات تخصيص اتصالات تونس، موجودين في حسابات البنك المركزي، و كانو 870 مليار عام 2013، و كي زدنا جبدنا منهم لتدعيم ميزانيّة 2014، أصبحوا 370 مليار....
نزيدكم باش تطمانو، آخر نشريّة للإحصائيّات الماليّة أصدرها البنك المركزي، هي النّشرية عدد 192، بتاريخ أكتوبر 2015... و كي نمشيو للصّفحة 3 من هالنّشريّة، نلقاو هال370 مليار مازالت موجودة في وسط rubrique اسمها Mise à disposition...
الحاصل، الفلوس موجودين و ما تبخروش، اما بلادنا تعاني فوضى التخضريط و الاشاعات دون اي خبرة تقنية تسمح بتفسير الحقيقة و الله يحسن العاقبة…
نهاركم زين يا توانسة…