مدرسة الرقاب وضربة البداية

هي كانت ضربة البداية وتوا اللعب الصحيح باش يبدأ..كل مسؤول باش يتذكر وجود وكر من هذه الاوكار داخل مربع حكمو..كل عين مدعمشة باش تتذكر انها شافت يوما ما في زقاق ما لحية إخوانية أو هركة أفغانية..او حتى تشبهها موش مشكل..كل واحد يأخذ نصيبو من شهرة العيون اليقظة…

يا سيدي سكروا كل المدارس القرآنية..المرخصة وغير المرخصة..ما حاجتناش بروضات قرآنية تفرخ الارهابيين.. سكروا المدارس القرآنية خلي الحاكم لي حفات رجليه في مراقبتها يهتم شوية بمروجي المخدرات قدام المدارس الحكومية.. اولادنا موش لازم يحفظو القرآن المهم احميوهم من الزطلة والحرابش والسلتيا لي وصلت داخل الأقسام..

سكرو المدارس غير الصحية واعطيونا بيئة صحية في مدارس الحكومة: سقف ما يقطرش وما يطيحش..توالات ما تجيبش الكوليرا والسيفيليس..قاعات ما تمرضش بالروماتيزم والبرونشيت..مطاعم مدرسية ما توكلش اولادنا الجيفة وما تسرقش من قوتهم..مبيتات ما فيهاش قمل وما يموتوش فيها اولادنا حرقا..

سكرو المدارس القرآنية وشوفولنا حل في مائة ألف طفل يبطلو القراية سنويا..قداش منهم باش ينحرف أو يحرق ويموت في البحر أو ينتحر أو يضيع..قداش منهم وفرت له الدولة حل بديل..؟ قداش منهم انقذه الإعلام الوطني الهادف من جحيم الفقر وعار الجهل وحرقة الضياع ؟

سكرو مراكز تفريخ الارهاب وانقذونا من بلاد البراكاجات والنطرة والخلع ومهاجمة المترو والسطو على البنوك واقتحام المنازل وقتل العجائز واختطاف الاطفال ونهب المارة..كم من إرهابي في الشارع حر خاطر ما عندوش لحية وموش لابس قميص ؟ كم من ارهابي ما قراش قرآن عند شيخ اما تعلم كيفاش يتحيل على شعب كامل ويرهن قوته ويفرط في ثرواته ويبرك على انفاسه باسم القانون والديموقراطية والصندوق والانتخابات والمحاصصة والتوافق والمصلحة العامة ؟

سكرو المدارس القرآنية..سكروها كلها..ما نحبوش قرآن..اما انقذونا من اعلام القذارة، الإرهابي الحقيقي لي خلّى اولادنا يتشبهو بشورب وولد مفيدة وولد عواطف وأولاد كل الكلاب المسعورة..خلينا نعلموهم حاجة اخرى غير عندي ما نفضحك وايجا نتسابّو قدام العالم..

سكرو المدارس القرآنية اما ما تدخلوناش في سياستكم القذرة..يزي ما وقفتو حال البلاد باش تحاربو النهضة..سبعة سنين ضاعت من عمر الأطفال والشباب وانتوما تتحاربو ..سبعة سنين والأمل مرفوس والحل ضايع وأنتم تتعاركو على كراسي الفشل..

يكفي ما رميتم فشلكم على النهضة المرزوقي وتركيا وقطر وحتى الإمارات والسعودية وإسرائيل وأمريكا وفرنسا والشيطان وكوكب زحل..الشر فيكم أنتم..اغلبكم خونة وبيوعة..فيكم من يبيع البلاد بدينار وفيكم من يبيعه بوهم المركز وفيكم من يبيعه خوفا ان يؤول إلى غيره..

هل أقول لكم شيئا أخيرا؟ لو لم تكونوا أنذالا كلكم لما كانت المدارس القرآنية ولما ابتلينا بكل الدواعش الذين بيننا بمتأسلميهم وملحديهم..