ما يزيش صادرولنا ''الله أكبر'' لين ولى الواحد يحشم و يخاف و يلبو العرق كي يسمعها على غفلة في طيارة و إلا في مطار و إلا في نهج و إلا grande surface في فرنسا و إلا ألمانيا و إلا إيطاليا…
يحبو يكملو يمسحولنا شفايفنا من عبارات الشكر لله و التسبيح بحمده…
مؤسف ياسر...و موش حلو حتى طرف...و مقزز...و ما يخدمش الدين حتى غرام كونو تونس وقتلي طاحت للحضيض في كل شيء ولات انهجها و بلايكها مكتوب عليها سبحان الله و ما شاء الله و الحمد لله…
• ماشاء الله على شنوة…عالوسخ الي معبي البلاد…!!!
• ولا عالكياسات المحفرة…!!!
• ما شاء الله على التوانسة الي ولات الروح عندهم كالذبانة…!!!
• و الحمد لله على ماذا…؟ على تفقير البلاد و تفليسها…!!!عالدينار الي ماشي و يشرب…!!!
• و سبحان الله على شنوة…؟ على سرقة فاليجات الناس و عينهم تخزر…!!!
• علي يتعاركو كيفاش يقسمو البلاد حصص تقولش عليها سقيطه..!!!
• علي يستناو و يتمناو وقتاش تشد بعضها باش يزيدو يغوصو..!!!
الرسول صلى الله عليه و سلم يقول فيما يقول : ''ليس الإيمان بالتمني و لا بالتحلي و انما ما وقر بالقلب و صدقه العمل''…
بالله كي يجي زائر لتونس و يشوف الوسخ و الفوضى و التقوعير و التجودير و قلة الخير و التنوفيق و التكركير و الكياسات المكسرة و الغبابر و يقرى ''نهج بسم الله'' ''مفترق سبحان الله'' ''محول ماشاء الله''…الخ…تقترن عندو هذه العبارات و يصيرلو غصبا عنو ربط بين العبارة و الصورة…؟
يولي فين يسمع كلمة سبحان الله يتذكر أكياس و أكداس الزبلة…و فين يرى عبارة ما شاء الله يتذكر فاليجتو كيفاش لقاها مفروتة و دبشو متفتف دوب ما وصل لمطار تونس قرطاج…و فين يسمع كلمة الحمد لله يتذكر التاكسيست الي خذا عليه 100 اورو على كورسة ما تسواش 10 دينارات…
معناها واحد يحاصروه لين ماعادش ينجم ينطق حتى حرف من دينو…مخافة كونو يخلطوه و يجلطوه…واحد صلاتو الكل تولي سر…باش ما يسمعوهش يقول ''الله أكبر'' ترصيلو يبحث…
و يولي المسلم العادي..خايف على دينو و خايف من دينو و يولي يدادي بيه موش عارف اش يقول و آش يعمل…و هذي هي الحالة الي حكى عليها سيدنا محمد و قتلي قال فيما معناه ..يجي زمان يولي فيه الي شادد و متمسك بدينو تقولش عليه شادد في يدو جمرة عافية…
و هانا فيها…
و الحاصل الجهل مصيبة…و يفعل الجاهل بنفسه…و سبحان الله و الحمد لله و لا الاه إلا الله و لا حول و لا قوة إلا بالله….و حسبنا الله و نعم الوكيل فلي كان سبب….