عام تعدى على إيقاف قيادات سياسية في قضية التآمر المزعوم ...عام ومواطنين توانسة يقبعوا في السجن بلا تهم جدية ...عام ومأساة العائلات متواصلة بسبب تهمة هوسية فضفاضة ماهي موجودة كان في ذهن الجهة اللي فبركت الملف..عام من الظلم والقهر المسلط على مجموعة من المواطنين اللي ذنبهم الوحيد انهم اختاروا يعارضوا السلطة الحالية..
عام وولد جوهر بن مبارك اللي عندو وضعية خاصة محروم من بوه وهو في أمس الحاجة ليه ، كيما بعدوه على الطلبة متاعو وخرجوه من خدمتو كأستاذ قانون ...عام تعدى على سجن واحد من أنظف وأنجح الوزراء والنواب غازي الشواشي ...عام تعدى على سجن شخصية سياسية قليل منها في المشهد السياسي كيما عبد الحميد الجلاصي اللي تظلم وقت بن علي واليوم تظلمو الدولة مرة أخرى في عهد قيس سعيد…
عام من التنكيل تعدى على عصام الشابي المناضل اللي عطى حياتو للديمقراطية في البلاد ملي هو طالب...عام ورضا بلحاج المحامي ورجل الدولة اللي دخل نظيف وخرج أنظف من السلطة رغم المناصب اللي تقلدها يعاني في الظلم وهو لا عملت يدو ولا ساقو …
عام وخيام التركي محبوس لا لشيء لانو حب يعمل مبادرة ويساهم في توحيد المعارضة واللي هذا يفترض حق دستوري لأي مواطن يحب يعمل السياسة.
عام تعدى والتوانسة عايشين حياتهم بالطول والعرض في وقت فما مساجين سياسيين في البلاد تسلبت منهم حريتهم في قضية فارغة مش تبقى وصمة عار في تاريخ القضاء التونسي.