برّا يا سيدي خلّي نتفقوا بداية في انّو اتحاد الشغل قوة عندها وزنها في المشهد الخارجي و الداخلي في تونس و متفقين في انّو الاتحاد مالثورة و ردّ جاي دخل السياسة بشكل غير مباشر و يدعم في شقّ سياسي معيّن زادة و هذا فيه وجهة نظر كبرى حول هل مازال العمل النقابي فعلا في منأى عن الشأن السياسي أم أنّه تسيّس بعد الثورة و معادش انجموا نفصلوا بين الزوز لتداخلهم ؟
المهم مش هذا موضوعنا ؛موضوعنا هو تصريح الطبوبي أمين اتحاد الشغل بأنّه الاتحاد سيدلي بدلوه في الانتخابات القادمة و هنا عدّة اسئلة مشروعة للطرح : شمعناها سيدلي بدلوه ؛يعني هل سيكتفي الاتحاد بتوفير اللوجيستيك و الدعوة الى التسجيل و دفع الشعب للتصويت أم سيتدخّل في اللعبة السياسية ؟ يلزمنا نفهموا أه مالا شنوة !!!
ثانيا : هل الاتحاد داعم لحزب معين أم لا ؟ يجب التوضيح هنا زادة ،لأنّ الاتحاد بقوته و عتاده البشري و الحشد متاعه(أكثر من 600 ألف منخرط )و آلاف المقرات الوطنية و الجهوية و المحلية و النقابات و بالتالي هذا عامل تأثير كبير قد يقلب معادلة بأكملها .
ثالثا :هل ممكن انو اتحاد الشغل يكون في نفس الوقت منظّم و طرف !!! (يعني الخصم و الحكمْ)
و اني حقيقة استغرب أن توافق الISIE على هذا المقترح لأنّ الاصل فيه و المنطق يقول إن الانتخابات والتسجيل يجب أن يجرى في مقرات عمومية بعيدة عن الجمعيات و النقابات و الأحزاب (يخي حني ناقصين مدارس و معاهد ،و شوفوا هاكا الاقبال اللي على خاطره الاتحاد بيحلّ مقرّاته للتصويت ،في اندونيسيا حني ماهو )…
ڤالكّ يا سيدي "اعداد خطة إعلامية وتعبوية مشتركة لدفع عملية التسجيل ...". هههههههههه و الله كان دِرْتولنا خطة عمل ونهوض بالانتاجية خير ،فهيئة الانتخابات عندها ميزانية مرصودة و مقرات و عتاد بشري و الشعب الكل معاها كان لزم و ما تحتاجش "حنّية الاتحاد" تي هِكّة ولا مش هِكّة : تي ڤولولي بربي يخي بالك غالطة أني ! ولاّ الشفافية والحيادية مجرد شعارات برّاقة و أكهو ؟؟؟
أني من توّة مشكّكة في الانتخابات هاو باش يبدا في بالكم….