مشهد 1
عمارة فيها عزاء، العباد حزانى ومولى الدار مقطع روحو بالبكاء. تعدات جارتهم ماكياج وبارفان وروبة بالنوار.. سلمت ودخلت لدارها وحلت الموزيكا تشرقع.. علاش يا بنت الناس عيب عليك جيرانك عندهم جنازة قالت: انا حرة في داري واليوم عيد ميلاد بنتي تحبوني نحفلو بالقرآن؟.. حرية ضمير..
مشهد 2
مراة وحدانية مزيانة شباك الصالة متاعها مقابل شباك جارها.. السيد مغروم ب les muscles fessiers متاعو طول النهار يدور عريان في الصالة.. والمرأة كان جبدت الريدو لازمها تشعل الضوء في النهار وكان حلّت تمسي وتصبح على ترمة سي خونا.. يا ولدي علاش هكه؟ في داري، عندكم مشكلة مع الجسد؟.. حرية لباس..
المشهد 3
عايلة باش تعدي نهار في البحر.. عامو وتبحبحو وخرجو مالبحر.. جماعة تحضر في الفطور والشايب جبد زربية باش يصلي.. مقابلينو جماعة دايرين على كعبات بيرة وصحن حوت.. هو يقول الله أكبر وهوما يكفرو.. هز زربيتو وبعد شوية.. يقرأ في القرآن ponctué بالكلام الزايد متاع الجماعة.. جاء يكلمهم قالو له تحب تصلي صلي في دارك، الشط للناس الكل.. حرية تعبير..
المشهد 4
عمرو 25 سنة، يضرب حيط يهدّو.. بطال ما عينو في خدمة.. قام نصف النهار خذا مصروفو من عند الوالد.. قال له ولدي شنو تعمل بالفلوس رمضان وانت صايم قال له بابا نخليها عندي لعل نشتهي حاجة نجيبها لشقان الفطر.. هبط لوسط البلاد يدور على القهاوي المحلولة.. كلها عاملة جرايد على البلار.. خذا قهوة وسندويتش وخرج البرا... يا ولدي ادخل كول لداخل ما يصيرش... قال له علاش ربي وكلك على رمضان؟ الي يحب يصوم يصوم في دارو.. وانا حر في الشارع.. حرية تنوع "الديون"...
ربي يعطينا بلاد تكون الحرية فيها بال permis..