وانت تشق فطرك كل نهار مع عائلتك ربي بحفضهالك.. تذكر أن تونسي بسيط هاجر إلى ليبيا لضيق الحال ... ولا شكون يرضى يغامر في بلاد فيها حرب كان الي تقطعت به السبل..
هذا المواطن المزمر له عائلة ولا سوابق له، روح لبلادو واحتمى بدولته لكنه بقي عالقا على الحدود لأسابيع وتمرمد وأحس بالخذلان ... وشتم سيادتكم لا في لشخصكم بل شتمكم لأنكم تمثلون "الدولة " الي من واجبها حمايته وإسعافه.. لكنها خذلته.
السيد يتشد وينكل به وتؤخذ صورة له وهو على ركايبو في انتهاك صارخ لكرامته (السيد عندو ام واب واخوة ويمكن اطفال..) ويتهم بارتكاب فعل موحش ضد سيادتكم.
عينت الجلسة لمحاكمته اليوم 06 ماي وتم تأخير الجلسة الى 20 ماي .... شنوة المشكل لا والي لا تالي لا لوبي وراه ولا حزب ولا سفارة: خليه يستنى ويتربى ويكون عبرة شنوة المشكل 20 يوم على الحدود و25 يوم ايقاف ... ماهو مستانس بالتمرميد..
سيدي الرئيس الذي يخرج ليلا لإعانة المحتاجين: تصور للحظة ان من سجله أراد به سوء " فهل سيقال تولى امرهم وأهملهم وظلمهم فمن يحملها عنك يوم القيامة؟
سيدي الرئيس انتظرت ممن يروف بالمحتاج وبالمظلوم ويدعو إلى الكرامة والعزة والمواطنة أن تسقطوا حقكم في تتبع هذا المواطن البسيط الضعيف الذي ابتعد عن وطنه سعيا وراء لقمة العيش بشرف وانتظرت منكم ان ترتفعوا بنفسكم عن الضعف البشري وفوق الانتقام.
لقد خاب ظني في سعة صدركم وتيقنت ان السلطة تغير البشر وان علماء النفس على حق حين استنتجوا ان سلطة السلطة تلغي جميع أنواع التعاطف، فلا يمكن أن نصدق الحاكم حين يدّعي أنه يفهم مشاعر شعبه.
ننساوو التعيينات الأمنية واجتماعات قرطاج ومستشارة الرئيس الي تصول وتجول. ننساوو مشاكلنا الاقتصادية والعام الصعيب الي ما نعرفوش لا كيفاش نبداوه ولا كيفاش نكملوه.
ننساوو محاربة الفساد والناس الي لابسة " تاج " فوق روسها موش عندها ريش وجماعة الاتحاد الي كل ما تبربش دوسي من الدوسيات العفنة يعملو ووووه ويبدأ التهديد والوعيد. ننساوو دعوات البعض بوجوه مكشوفة وبكل: صحة رقعة" بالانقلاب على الصندوق وباقتراب ساعة الصفر.
وفاش نكبشو؟
نكبشو في الطفلة الي "تطاولت " على القرآن و نكفروها و نطالبو بسجنها و بمحاسبتها و نعملو منها برسيبوليس 2 وأمينة فيمن 2 و سلمان رشدي.. و نحيرو علينا هيومن رايتس ووتش و المنظمات الحقوقية الي هي تسننا في الفرصة. اليوم بعابص كبار لا تحترم معتقدات غيرها قاعدة تغم على مشاكل بلاد غارقة للعنكوش. نكبشو في السيد الي داخل من الحدود وشتم الرئيس.. ناس بكري قالو " يلعن الباي في غيابو " .
فيقو على رواحكم بلاد منكوبة متداينة وحكومة تعوم في الشايح لا برنامج واضح ولا رؤية: ناس في صلب الحكومة ضد بعضها و كل واحد يستنى في خوه في الدورة و ساكن قرطاج برنامجو وحدو و يخطط على بعيد.
البلاد هازها الواد والعام ماهوش صابة. فيقو قبل ما يكلنا البهيم.