الطبوبي قلّكم أقسمت بأغلظ الأيمان أنّو الزّيادة متع الوظيفة العمومية ما تكونش أقلّ الزيادة متع القطاع العامّ!
ما عادش فيها عاد!!! الرّاجل حلف وتحبّوه يحنث؟؟ شوفوا وين وصلنا في التّغفيص النّقابيّ؟ معناها الرّاجل يتفاوض باليمين !!! قلّك حلفت !!! يجيش منّو نكسّروله يمينه؟
بون من حيث المبدأ ماناش ضدّ الشيء هذا، آما من حيث الأسلوب ظاهرلي ولّينا بالحقّ رهاين عند كمشة مجانين.
وكي يقوم الشّاهد ويحلف هو زاده يمين غليظة يقلّك وراس السبسي اللّي حرقلي قلبي ما صارها، آش عملنا وقتها؟ نهزّوكم الزّوز تحلفوا في سيدي بومنجل؟
ملاّ عمل نقابي متع أعرق منظّمة في تاريخ برّ تونس؟ تخدم بالحلفان !!!
وبربّي سؤال آخر لسي الطّبوبي: يا خي سيادتك تحلف علينا ولاّ على الحكومة؟، ياخي الحكومة مرتك؟ معرّس عليها؟ هو الواحد حتّى على مرته ماعادش يحلف ويتكتّف.
ايه وكي أنت حلفت بأغلظ الأيمان، آش تحبّنا نعملولك احنا؟ برّا صوم ثلاثة أيّام؟ ولاّ أطعم عشرة مساكين ولاّ حرّر رقبة! شوف أقرب رقبة ليك وحرّرها هاك تبارك الله عافس على برشه رقاب.
والغريب في الأمر عنده جملة ديما يعاود فيها: "المراهقين السياسيين؟؟؟" ما لا آش يتسمّى اللّي يعمل فيه سيادتو؟ هذا موش مراهقة. هذا تفوريخ عزايز جاتهم المراهقة على كبر.