درس في الانفصام النقابي

الطبوبي موش ضد السلطة القايمة ويعتبرها شرعية، هو فقط ضد انو الاتحاد واللي معاه ما يشاركوش في السلطة ولو حتى شكليا( خاصة شبيحة حركة الشعب والوطد) ؛ الطبوبي موش ضد إملاءات صندوق النقد، الطبوبي ضد إنها تكون من غير الرأي المطابق(والضروري) للاتحاد( وبالطبع من بعد يتبرا منها) ؛

الطبوبي موش ضد الرئيس ويحبو لانو عمل اللي فشلو فيه النداء والشقوق متاعو( وهذاكه علاش يطالب بتعديل الحكومة لكن محال يطلب انتخابات رئاسية مبكرة)، لكن الطبوبي ضد حكومة الرئيس اللي تنفذ في سياسات الرئيس وما عندها حتى سلطة تقريرية؛ الطبوبي موش ضد 25 جويلية، الطبوبي ضد إقصاء الاتحاد والأحزاب اللي راضي عليها في إدارة المسار؛ الطبوبي موش ضد الانتخابات في ظل نظام انقلابي،

الطبوبي ضد انو جماعتو في الأحزاب ما عندهمش بقعة فيها؛ الطبوبي موش ضد الانقلاب على الارادة الشعبية وصناديق الاقتراع، الطبوبي ضد انقلاب ما يكونش فيه الاتحاد شريك اجتماعي يفرض رايو( ومن بعد يسميه "فترة سوداء" إذا طاح)؛ الطبوبي موش ضد التطبيع مع الكيان الصهيوني، الطبوبي ضد التطبيع اللي يكون الشرط متاعو تحجيم الاتحاد وارجاعو لدورو في " تثمين الخيارات" و"رفع التحديات"؛

الطبوبي موش ضد عودة الأحزاب " الشيو- تجمعية" للحكم لانهم تابعينو ومحال يلوو العصا في يديه، الطبوبي ضد عودة النهضة وائتلاف الكرامة لانهم ما يشبهوش للشبيحة والوطد واللي يخدمو فيهم طابور خامس للمنظومة القديمة؛ الطبوبي ببساطة موش ضد أي شيء يقصي النهضة وائتلاف الكرامة، المهم ما يتحل حتى ملف فساد ضد قيادات الاتحاد ويكونو في الواجهة (ولو زينة) وما تتهدش الخيمة على رأس اللي فيها ( الوطد والشبيحة)..

مختصر القول: الطبوبي مع أي شيء يضمن مصالح فرانسا والنواة الصلبة متاع المنظومة القديمة، لكن ما يضرش بمصالح الطوابير الخامسة متاعهم( الوطد والشبيحة وسقط التجمع) ويعطيهم ولو جزء بسيط من السلطة ومن "القدر" قدام عموم الشعب…البقية الكل تفاصيل.