خلينا نفترضو انو قيس سعيد برنامجو غامض، وممكن حتى يكون برنامج طوباوي وفاشل. لكن الخطورة متاع قيس سعيد هي مجرد " إمكان"، يعني ممكن ينفع البلاد وممكن لا. بينما المؤكد انو جماعة المنظومة برامجهم الكل باش تزيد ترسكل الفسّاد وياش تعاود تنتج نفس السياسات الفاشلة وتعمق الفقر والتبعية.
باش ننتخب قيس سعيد لأنو ممكن ينفع وممكن لا، لكن في كل الاحوال موش باش يلقى الميدان فارغ من أي معارضة حقيقية( من الناس اللي انتخبوه ومن الناس اللي يكرهوه)، ومانيش باش ننتخب نبيل القروي لأني متأكد انو إنسان مافيوزي( سقط المنظومة) مستحيل يلقى معارضة حقيقية وباش يضر البلاد لا محالة.
مختصر القول : باش ننتخب قيس سعيد لأنو المنظومة الكل باش تكون ضدو، يعني باش يلقى قوة تعديل وضغط تخليه ما يتغولش وتخليه يعمل كان الافضل في إطار موازين القوة يكون محتاج فيها لدعم شعبي حقيقي. بينما لو ننتخب نبيل القروي باش نلقى روحي قدام شخص وراه المنظومة الكل( رجال الاعمال، النقابة، الإعلام، السفارات الخ الخ) وموش محتاج لأي إرادة شعبية بعد ما يوصل للقصر، يعني ينجم يعمل في عذابنا صنعة( وأولنا الناس اللي باش تنتخبو) وما يلقى حتى معارضة حقيقية من المنظومة اللي باش تحارب قيس سعيد لو يوصل لقصر قرطاج.
انا باش ننتخب قيس سعيد لأنو باش يلقى محتاج لصوتي حتى بعد ما يوصل لقرطاج، باش ننتخب قيس سعيد لأنو ما ينجمش يتغول ( ماعندوش حزب وإلا كتلة نيابية)، باش ننتخب قيس سعيد لأنو المنظومة باش نخليه ديمة محتاج لدعم الشعب في أي مشروع قانون يعملو، باش ننتخب قيس سعيد لأنو ما فشلش قبل وتنجم نتوقع انو ممكن ينجح، باش ننتخب قيس سعيد لأنو أسوأ ما ثمة في تونس يهاجموا فيه ويدافعوا على إنسان مافيوزي…بعد ما كانوا يدافعوا على المافيات الجهوية الأيديولوجية اللي نهبت البلاد لمدة عقود،
وأخيرا باش ننتخب قيس سعيد لأني نحب نتحرر من خرافات النمط المجتمعي التونسي اللي هي مجرد استعارة يتخبى وراها واقع الفقر والتهميش والتبعية والجهوية والزبونية والأمراض متاع المجتمع الكل.