سال حبر كثير حول دور والي جندوبة في الايقافات التي طالت شبكات مافيا المال العام هناك... هل أن نقلته إلى سيدي بوزيد عقاب له على محاربة الفساد أم استنجاد به ليواصل الحرب؟ أنا لا أعرف هذا الوالي لأحكم له أو عليه... مع تسبيقي الخير.
فقط ما أعرفه أن حكومة الشاهد غير معنية بغير توفير سلطات جهوية ومحلية تخدمها في محفل التكاذب الإنتخابي القادم... ما أعرفه أيضا؛ ظروف العمل الجحيمية في ربوع تونس العميقة. ليس سهلا أن تشتغل مستندا إلى ضميرك أبدا أبدا... ستشقى وتشقى؛ إما تنسحب أو تستسلم للإغواء والإغراء....
ضربة البداية؛ enquête مفصلة عن أصل وفصل المسهول الجديد... جس نبض.... ضيافات... وقوادات... وعرض خدمات... وإن أبدى مووومانعة؛ تنهمر قِرَب الزيت وعكاك العسل وغراير القمح وعلالش بوزيد على والده أينما كان وكيفما تباعدت المسافات... يحشم المسهول وتبدى خيوط التواصل...
مجالس وردية لأكل اللحم وركوب اللحم وإدخال اللحم... وصوّر يا مصوّر.... وبعديها يولّي ياكل في الكف وهو مبلّع... وساعتها يواصل الصبايحية المحليون النهب والصفقات وطرد المستثمرين والاستحواذ على المواد المدعمة سميد المخابز ونخالة العلف... خصوصا خصوصا نخالة العلف... لأنو فيها مصوار بالمليارات... ما تنسوش راكم في ولاية الحليب والعلوش ودجاج الحاكم!!!
صعب صعب جدا أنك تصمد في مواجهة الإغراء.... لقد أصبح العمل في هذه الولاية حلم كل طامع في تطليق الفقَرْ... حتى أصبحت تسمى الخليج.... يدخلها تِر فِر يغادرها بفيلّا فارهة في أرقى أحياء مدن الحظوة الطبقية وسيارة فارهة وزهاز الدار... وتيكيات الطيارة ومصروف ولدو اللي يقرى في الخارج....مع تخمة أكل اللحم الشهي…
عام 2007 يتلقى هاتفا... ألو مرحبا... آنا فلان الفلاني... مستثمر في مقاطع الرخام... مطلبي مازال واقف على موافقتك.... باهي سيدي.. مطلبك وصلني؛ قدمت مطلب في سيارة إدارية ونخرج للمعاينة واجابتك سريعا.... يومة غدوة يعاود يطلب....... خويا والله مازلت نستنى في الكرهبة ماك تعرف روتين الإدارات العمومية ومحدودية أسطولها.... تعرف كيفاش آنا نهزك ونجيبك... شوف خويا رغم أنو بالقانون ممنوع لأن المطلوب مهمة محلفة فلابأس لتسريع الأمر..... موعد فذهاب فمعاينة.... مسح ميداني لجبل وسفحه شبرا شبرا... كملنا خويا؛ ممكن نروحو.... تفضل تفضل اركب.... ها شنوة؟ .....
شوف خويا؛ توة يجيك الجواب من الإدارة العامة... أنا مهمتي تقتصر على إفادتها بتقرير مفصل.... نعرف نعرف لكن نحب نطمّن وبرّة.... مممممم لا بأس لا دليل على وجود توطن بشري نحن معنيون بحمايته حفاظا على الذاكرة الثقافية. توة تجيك الموافقة واخدم على روحك ربي يعاونك... وفجأة يوقف سياراته ويبحلق فيّ عيناه تكاد تخترقني.... شبيك خويا لا بأس؟؟ يواصل الصمت والبحلقة...
وتكلم اخيرا (الحمد لله على خلاص الوحل)... ممكن نسألك سؤال؟ إيه تفضل.... أنت سي فلان؟ هههه لا سكريتيرو!!! أسمع سي ربي... والله العظيم الكل كلو (أكلوا: قبضوا العمولة). شكونهم الكل؟... الجماعة الكل (سرسطهم الكل... مسؤولين كبار وصغار محليين وجهويين). بصراحة كي جاوبتني بكل بساطة دون إيهامي أنو الموضوع صعيب وومكن نتعطل عالرخصة شكيت فيك. ياخي مازال مسهول ما يوكلش في هالبلاد؟؟؟
هههه؛ هاك لقيت مسؤول بوهالي ما يوكلش.
مرجوع حديثنا:
تنجم تكون مسؤول نظيف.... وهم كثيرون... لكن يطيحوك للدّنْكْ (هذي لهجة محلية). يلزمك تكون في صلابة الجبال حتى لا تقع في فخاخ الإغواء والترغيب ولاحقا الترهيب ساعة تقع في فخ مجالس اللحم... ليس سهلا أن تشتغل محتكما إلى ضميرك في مجتمع يصنع الفاسدين صنعا…
• سحقا بنعلي…
• سحقا تقاليد القبيلة...
• سحقا لمجتمع متواطىء مع الفساد....
وحدها صرامة القانون... والرقابة المواطنية كفيلان بإنهاء كل هذه الطواعين…