الشيء اللي موش فاهمينو منظومة الحكم لقيس سعيد و وزيرة العدل و المركب الأمني القضائي الحاكم هو أنو في المناخ متاع المنظومة الأمنية و القضائية الحالية و اللي عمرها ما وصلت حتى في أحلك فتراتها للوضع اللي عايشينو اليوم .. في المناخ هذا متاع الإعتباطية و الظلم و عدم إحترام القانون و الإجراءات راهو حتى إذا كانت القضايا صحيحة و الأحكام صحيحة راهو في أول فرصة باش يقع اللي وقع في 2011 : الأحكام الكل و القضايا الكل تولي باطلة بالصحيح فيها و بالباطل اللي فيها…
المحاكمات اللي ما تتوفرش فيها شروط المحاكمة العادلة حتى كيف تكون صحيحة تولي باطلة. و اليوم الأحكام الكل اللي صايرة في القضايا السياسية و القضايا الإقتصادية و غيرها .. محكومة في مناخ قضائي باش يحكم ببطلانها في أول فرصة ترجع للمؤسسات دورها.
و هكا باش يكون الرجوع إلى الوراء يتم على قاعدة صحيحة ..
أما الشيء اللي يوجع أكثر هو أنو ما ناش خارجين من المحاسبة و المحاسبة المضادة .. سبعين سنة كل منظومة تجي تتلهى تحاسب في اللي قبلها .. و من غير ما نجمنا لا نحاسبو حد و لا نبدلو قوانين و لا انحيو الانتهازية و الفساد اللي هلكو البلاد .. مجتمع يحب المحاسبة و هو موش قادر يشوف روحو في المراية.. و هذه الحقيقة!
وقتاش نتلهاو بالبناء المشترك قتلي ؟ يا من عاش!!!
لعل الله يبدل قوما غير هذا القوم …