انا كامرأة ارفض الاحتفال والاحتفاء بهذا اليوم.. ارفض تلك الاعياد الفلكلورية التي اخترعوها للالهاء ولتزييف الوعي.. حتي قبل وقت الباجي ووقت اللي كانت تصير هاكا الحضبة المسائية علي شرفة القصر، كانت توجّه لي كل عام دعوة، ولا نهار مشيت ومديت وجهي.. بل انا كنت وما زالت اعتبر هذا العيد اهانة بالغة للنساء..
ماو لاباس عاملي عيد والمرا اللي تتكلم تدكّ في الحبس.. وكل امرأة لها موقف او رأي ما يعجبش يا في الحبس يا متسيب عليها باندية الواقع والافتراضي سب وسحل واعراض مستباحة.. ماو لاباس عاملي عيد وكل المنافذ للوصول الى صناعة قرار حقيقي في الدولة مغلقة امام النساء الجدّيات، المؤثرات، الفاعلات ومانحكيش علي عرايس السكر اللي مزينين بيهم واجهة ديمقراطية مغشوشة ..
حضور المرأة في داوئر صنع القرار وفي البرلمان وفي الحكومة يحشم وزاد عليهم الحبس وليوم تجي تحكيلي بمكاسب وحقوق النساء!!! ماو لاباس عاملي عيد وعندك الاف العاملات الفلاحيات دون اجر واضح ودون تأمين صحي ودون اعتراف بمواطنتهن.. حقا ماهو مشى ووقف خطيبا علي رؤوس عاملات الحقول في جندوبة اش صار في وضعيتهن.. شي.. الكميونة هي هي والمحرمة هي هي والعذاب هو هو!
ماو لاباس عاملي عيد ونسب ذبح وتقتيل النساء ولات هواية عند برشه رجال.. ثمه نساء تقتلت بالسلاح الوظيفي!! عملتو قانون وعملتو فرق مختصة.. العنف بعد القانون زاد وكل مرا تمشي تشكي للفرقة المختصة تروح تلقي سفاح ينحرها بالوقت.. النتيجة لا القانون حماها.. لا اجهزة الدولة استطاعت حمايتها..
ماو لاباس عاملي عيد في مجتمع ذكوري في عمقه ينجم يهنيها "بالعيد" في نهار بائس كيف ليوم..و تهبط عليه اللياقة واللباقة و الصفحات لكل تولي موشحة بالقلوب و التهاني و الكلمات الجميلة.. ونساء بلادي نساء و نصف وبلا بلا بلا
لكن ومع التنسيب طبعا .. تجرّب مالا تتفوق عليه في الخدمة.. والا تشد عرفتو.. والا تقلقو في الكياس.. والا ترفض عروضه العاطفية.. والا تتمرّد على سلطته.. والا تناقش افكاره النيرة و الا والا والا....وقتها يبعث الأعياد لكل تقضي.. وتولي "كل النساء عاهرات الا امي"..
طبعا دون الحديث عن العضلات الجاهزة لتسوية الأمر ان زاد التمرّد عن حدّه .. وجرّب تتكلم وتحل فمك معاه اول كلمة تقفز الي فمه تلك الكلمة.. وقت تعاركك مرا وما تجيش لمخك طول الكلمة هذيكا.. وقتها تنجم تثبت بينك وبين روحك ان كلمة شريك في الانسانية تليق بك.
ماو لاباس عاملي عيد وانت معندكش مشروع واضح للمجتمع، للأسرة، لمناهضة العنف ، لقانون الشغل...سنّ التشريعات لوحده لا يحدث التغيير حتي وكان تعاود تسنّ شريعة حمورابي! هل حمى قانون مكافحة العنف النساء من العنف؟؟ ثمه حكاية ناقصة.. ذهنية يلزم يتخدم عليها..
انا ضدّ وضدّ و ضدّ منطق المرأة الضحية.. دائما انا مع امرأة قوية تدافع بشراسة عن حقوقها وذاتها وكينونتها وتعامل الرجل كشريك في الانسانية وليس كوصّي عليها يقرر مصيرها..لأنه كما تقول سيمون ديبفوار "حتي احقر الرجال يرون انفسهم آلهة امام المرأة"!!!!
كوني امرأة وحسب.. لا زايد نص لا ناقصه ربع.. انت موش محتاجه نهار يذكّروك فيه قداش انت كائن رائع و مميز وان هذا العالم يسير علي ايقاع روحك وما تمنحينه له من حب وجمال.. علي ايقاع ما تزرعينه في اطفالك.. وفي محيطك.. تمسكي بحلمك ودافعي عنه بكل ما تملكين من قوة.. لا تدعي لا الظروف ولا العمر ولا التجارب الصعبة تطفىء روح الفراشة في قلبك.
أبي انت الوحيد الذي اشعر دائما وكل يوم اني ممتنة له.. ذلك الحطاب الذي راهن علي تعليمي وعلي بناء شخصيتي الصلبة التي لا تنكسر.. هو الذي صنع كل الاعياد ولحظات التفوق في حياتي.. الله يرحمك يا بابا.. وشكرا لانك كنت ابي يا ابي.
وشكرا لكل رجل يعامل المرأة كشريك حقيقي وليس مناسباتي !