خويا السمح علاش ما تستكفاش بروحك وتعمل دورة بالكبش متاعك العشية وتروح باللبن والملصوقة ..فيق على روحك وفك عليك من سوريا ولبنان وأكرانيا..أنت عطاك ربي ثورة جاتك هناني بناني لعبت فيها وبديت تهنتش في روحك ودخلتها في حيط. خويا التونسي الحر الأصيل والشامخ على كل القمم: يلزمك ديمه تتفكر الي انت أول مخلوق في التاريخ يكتبوله دستوره ويفصّلوله ويخيطوله حياته العامة وهو راڤد يتفرج في الكورة.. وبعد تنجم تدعي قول في قضايا العالم؟
التونسي العظيم: اني مُعجب بيك، في الحقيقة نحسدك على نظرتك الثاقبة الفاحصة للأحداث: انت تعرف بدقة ما حدث في 7 اكتوبر ومن فعل ماذا وتعرف كيف ومن قتل نصرالله وتعرف بدقة من وكيف ولماذا سقط الأسد.. وتتخذ مواقف حادة وحاسمة مع الجولاني ضد الشرع: يعني بلاد تتداخل فيها ايران مع السعودية مع تركيا مع مصر مع فرنسا مع " إسرائيل" مع أمريكا مع روسيا مع لبنان ..مع الإمارات مع قطر ..ومع ذلك انت تعلم بدقة ما جرى في الساحل السوري.. ومن قتل من ولماذا.
نسهلك سُهال: تعرفش البلجيكي الي شدوه بالسلاح في تونس وڤالولك بلاستيك؟ تعرف الي هو وقت خلط لبلجيكا عمل فيديو قال كان معايا سلاح حقيقي؟ شكون خرجه اذن من المطار؟ عملية المنيهلة تعرفهاش؟ باهي هاك الجماعة الي هربوا من الحبس ومشوا للقهوة متاع الحومة وقالولك باش نعملوا تحقيق؟ هاك الأرواح الي ماتت في جرجيس وقالولك استنّى تو تجيك الحقيقة؟
اربط علوشك في الشارع وابق تفرج عليه وروح تفرج على ريال مدريد وجمعية تزي وزو.