صورة تلخص 70 سنة تحديث وتنمية وتعاضد ودولة وطنية واصلاح هيكلي ولبرالية والمادة الشخمة ... وتعميم التعليم وحرية المرأة والتنظيم العائلي .... وخمس كليات طب وسبعة جامعات ومدينة الثقافة وزربية حمراء تعفس عليها بن مولاهم في أيام قرطاج السينمائية التي تنفق عليها مئات الملايين من الدينارات .
صورة تختزل عشر سنوات من الميك ماك والتكنبين والترهدين… صورة تخلينا نلعن اللحظة الي آمنا فيها بأنّ الفرززو يعطي العسل وأن القديمة ممكن تنتج وطن…
هذا ما جناه علينا النموذج التحديثي ودستور 59 والتحوّل المبارك والمسار متاع بن عاشور وتوافق باريس…. ودستور 2014. ليس بعد هذا الإذلال الاّ الموت . الدستور اخترعه عقل يحترم الذات البشرية موش عقل يدوس كرامة الإنسان بحافريه.
الحس السليم يقول أن لمّا يكون جزء من الوطن يتألم بقية الأجزاء تتضامن معه…. ليس بالضرورة التضامن يكون مادي لكن الصمت شكل من أشكال التعبير عن التضامن… تنجّم تسكت عن الكلام الذي يفهم منه أنّ وجع أولئك الناس لا يعنيك.
تنجّم تفكّر مرتين وتدوّر صبعك خمسة مرات قبل ما تكتب حاجة تجرح بها مشاعر الناس الي ما لقحتش وما خذاتش الجرعة الأولى والثانية وما مشاتش للبحر وما عملتش عيد ميلاد وأولادهم ما عدوش الامتحان… وموش مطيبة فطور عالمي .
الناس تستغيث وتبكي وتتوجّع وخايفة على أحبابها وأنت تنقد في أي فعل ممكن يخفف عليهم مصابهم… علاش مشى؟ بعد ما خلات علق مكحلة ؟ نصاف بن علية آش ماشية تعمل. هاو عيد ميلاد… هاو ينظفوا في الزبلة لانهم سمعوا بقدوم الرئيس.
الناس تنتظر في وقية أوكسيجين يأتيهم حتى من خرم إبرة وأنت توظّف في وضعهم الكارثي في تجاذباتك السياسية؟؟؟ وتعفّن في الهواء الي يتنفسوا فيه؟
الغريق يتعلّق بقشة….
الناس بحاجة للشعور بأن هناك قشة تربطهم بهذا البلد وأنت تصرّ على نثر الذعر والشعور باللاإنتماء… والتفتين وصب الملح على قلوب مجروحة… وإضافة الخميرة لهموم الناس. في السنة الفارطة كان التضامن غير مشروط بالجهويات مع مصاب أهلنا في الحامة وقابس ودوز…. في نهاية السنة كان التضامن آلي مع صفاقس والمنستير…. اليوم قلوبنا معلقة في القيروان وباجة .
عجبي ممن عاش لحظة الشك بين الموت والحياة ولا يخاف ربي في الناس التي تعيش نفس الوضعية… اسكتوا حتى شوية…. خلّي الملائكة تسمع صوت الآذان في جامع عقبة وتسمع صوت صابرة يطلب اللطف لأهل القيروان.
قولوا خيرا أو اصمتوا . تأكدوا أن المعارك الأيديولوجية موش هاربة وكان حيانا ربي وخلاتنا الكورونا مازال عندكم ما تبيعوا….. اعملوا pause