الناس الي طلعت تحليلها إيجابي وهزوهم للحجر الصحي سواء بمركز المنستير والا بمركز المهدية لم يقدموا لهم دواء ولا حرابش ولا علقوا لهم السيروم ولا اي شيء... فقط عزلوهم وبقوا يتابعوا فيهم حتى لا تتعكر صحتهم. وحتى لا تنتقل العدوى الى المحيطين بهم. والهدف هو الحد من انتشار الفيروس.
يعني الي عنده شكون في العايلة مصاب بالفيروس وشاكك في روحو…. ساهل برشة sans panique يعمل عزل ذاتي… يبعد على خلق ربي ويأخذ كونجي ويأكل مليح ويشرب برشة سوائل ويقيس الحرارة بشكل منتظم. ويدوش برشة مرات في النهار ويعرض جسمه للشمس ولما تظهر عليه علامات الإصابة وتتعكر صحته يطلب الجهات المعنية…. ما يمشيش للطبيب وما يشدش الصف في الاستعجالي. وحتى كان مشى للطبيب يقول انه خالط ناس عندها الفيروس. موش يخبي….
لأنه لو تصل أعداد المصابين بالمئات ليس للدولة الامكانيات لتقوم بعزلهم بشكل إجباري. ولا فائدة من ايواءهم في المراكز…. شوية وعي مواطني…. وكل واحد يتحمل شوية من المسؤولية ومن غير إرعاب ولا تخويف ولا توظيف.
صديق من اسبانيا قال انه هو وأمه وأبوه أصابهم الفيروس. مشى للمستشفى في سيارته … قبلوا امه وابوه لان وضعهم يتطلب الإيواء بالمستشفى وهو روّح للدار دون تحليل… بعد مدة والده توفي لانه كبير في السن ولديه مرض مزمن وأمه تعافات… وهو الآن بصحة جيدة لم يستعمل أي دواء. فقط التزم بالإجراءات المعمول بها.
أنك تعمل عزل ذاتي لا يعني أنك تسكر على روحك في غرفة.. لا امشي للبحر في سيارتك وأقعد في مكان بعيد على الناس… حط كرسي في الطبيعة واسرح مع نحلتك. لو كنت مضطر للخروج حط ماسك واحرص انك ما تسلم على حتى واحد … استعمل الجال وحاول الا تلمس الأسطح. ولا تقترب من الآخرين.
أسبوع ويتعدى…
نحكي تجربة وليس نظري… زوجي عاد من بلد مصنف برتقالي وعملنا حجر ذاتي في المنزل اسبوع. مع التحليل سلبي. والتزمنا بالتباعد والكماكة أسبوع ثان. ولازلت أضع الكمامة واستعمل الجال…. والتزم بالتباعد. وعايشة حياتي 5 /5.
يلزمنا نتعود على العيش مع هذا الكائن المجهري…. وحتى نتعود يلزم برشة وقت وبرشة وعي. وبااااارشة صبر. الكورونا ليست وصم ولا عيب ولا عار… وليست مرض أيضا. ممكن أغلبنا حامل للفيروس وموش فايقين … ربي يحمي خلقه…. ويرحم ضعفنا وقلة حيلتنا.