سيدة (عاملة طز حكمة) لصاحابة المحلّ: شني أحوال بنتك رجعت تقرا؟
صاحبة المحلّ: لا ما رجعوش قالوا باش يرجعوا غدوة.
السيدة: :زايد راجعين نهار 17 إضراب عام. (عبّات ساشيات بالخضرة) يلزمني نشري بزايد خضرة
باش ما نطيحش panne. شكون يعرف؟
صاحبة المحلّ: لا أنا نخدم على روحي.
السيدة: لا إضراب عام الناس الكلّ مضربة حتى العطّار مسكّر.
صاحبة المحلّ: يسكّروا على رواحهم. أنا نخدم أنا بنيّت عمّي مانيش تابعة لا الإتحاد ولا الحكومة.
السيدة: آش دخّل الإتحاد؟ هذا إضراب عام على الزيادات في الأسعار والغلاء والكواء. عاملينوا الزواولة باش يحسّنوا من ظروف عيشتهم. عاجبك الحال إلّي وصلنا له؟ العظم مقطوع والحليب بالباكو…
صاحبة المحل: الزواولة هاني نشوف فيهم كلّ يوم. موش إلّي راكبين كراهب ويحبّوا على العظم باش يعملوا طاجين وقاطو... الزواولة همّا الطلبة إلّي جايين من قفصة والقصرين وسيدي بوزيد ويحبوا على حارة عظم باش يعملوا عجّة يتعشوها. ما يشروش الفلفل بالكيلو والغلة بالقفة (تقصدها) يجوا يشروا قرنين فلفل وكعبتين بطاطا وساعات يكردوا.
أما الغلّة يغزرولها وساعات يتصوّروا معها. برّي بنية عمّي خلينا نخدمو على رواحنا ونأكلوا خبزتنا ...
انتم ضرّبوا خبزكم مخبوز وزيتكم في الكوز وشهاريكم مسمار في حيط. أمّا العطارة والخضارة كان يضرّبوا صغارهم يموتوا بالجوع....(ضحكة) وإلاّ الطبوبي باش يبعث لنا الجورني متاعنا؟
السيدة: ربي يهديك ... هات هات القضية خليني نمشي ما عادش بكري على الصغار. حديثك مع إلّي ما يفهمكش ينقص في الأعمار....
خذات قضيتها وخرجت وهي تمتم (ما هلك البلاد كان البهايم إلّي كيفكم).
قعدت نتبّع فيها ركبت سيارتها série 198 واتجهت نحو المدرسة الخاصة المقابلة الكوشة.
ما هلك البلاد كان "الطز حكمة" متاع برشة متشعبطين ومتناضلين.
كليمة قبل ما نمشي…
أسقط خلق ربّي:
1- خوانجي قلب الفيستة في عهد بن علي (هرب أو بعث رسالة أو ناشد وأخذ انخراط في التجمّع وحصل على وظيفة في القطاع العمومي) ثمّ عاود قلبها الأربعطاش ودرجين. وأصبح من الوجوه النضالية المُتزعّمة للشأن العام (بالفارغ أو بالمليان).
2- يساري إستئصالي وظّفه بن علي في حربه ضدّ الخوانجية وساهم في تعفين الوضع وتكريس الدكتاتورية والتحق بالثورة "الأربعطاش غير درج"....
3- نقابي أخذ قطعة أرض في حدائق قرطاج وخضع لابتزاز بن علي وساهم في تدجين المنظمة، والتحق بالنضال النقابي "الترويكا ودرج". وأصبح رمزا من رموز إدارة الشأن العام و"يَقُود" في البلاد.
4- إعلامي أكل من جميع القصاع (القذافي- صدّام- الأسد- بن علي- الطرابلسية..) وعطوه دار في حي الصحافة، ثمّ التحق بنقابة الصحافيين وأصبح مُناكفاً على استحقاقات الثورة "الترويكا وربع".
5- مواطن عفسوه الجماعة (1+2+3+4) ومازال يبرّر في السقوطية بـ "الدين" أو بـ"الأيديولوجيا" أو بواجب وحدة الصفّ.
الأكثر سقوطية:
نحن إلّي ساكتين على سقوطية (1+2+3+4+5).
تحياتي.