مع احترامي وتقديري للسّواعد السُّمر وتونس الخضراء وما فيها من وديان وماء مجردة وميلان....هالنهارين نخدم على بعض التقارير الاقتصادية السنوية في بلدان ما عندهاش 3000 سنا حضارة ولا جاتها الزازيه الهلالية ولا تحدّث عليها هارون الرّْشيد ولا جعفر البرْمْكي، ولا جابت بن خلدون ولا أحمد بن تومرت ، ولا عرْفتْ بنْ عاشور ولا الدغباجي ولا كشّ على اًمّاليها ابو القاسم الشابي…
هالدول هاذي نهار نهارين ووحدة عاملة إنجاز واحْنا نتفرّجو كيف البراينيه. هاي وحدة مدشّنه أوّل قطار صُنع محلّي (الدّزاير( ولُخرى مدشنة اكبر محطة للطاقة الشمسية (المغرب) والبلاد لُخرى (السعودية( المسؤولين الكبار متاع الدولة ماشين يعملوا في جولة إدّوم شهر كامل من غير ما يروّحو لِدْيارهم في جنوب شرق آسيا باش يعملوا اتفاقات يستفادوا منها.
وهاو البلاد هاذي ماخذه أسواق كبرى جديدة في افريقيا، وهاي العاصمة هاذي مْصنّفة اول مدينة (كيغالي في رواندا اللي ماتو فيها عام 1995 مليون ونص في حروب عرقية).... والوقت يمشي واحْنا الإنجازات الكل متاع تكوين احزاب جديده، وهاو تكتل وجبهة وائتلاف واستقالات…
وهاو تسريب اخبار متاع تمكميك وتطييح قدر... تِهيّ المكسيك اللي هي كيما نقولو بوّابة متاع أزمات مالية عالمية موش أزمة بين جمهور السئ اس اس ولِتوال...بدات عام 2012 في إصلاحات اللي هوما 11 ويخُصّو اغلب مكونات الاقتصاد واللي البعض منها يستوجب تغيير في الدستور وما ادراك، معناها بالضبط عامة اعتصام النافورة، الشهر الجاي باش تكون البلاد اللي باش يسألوها الممثلين متاع منظمة التجارة العالمية في جينيف آش عملت في الإصلاحات متاعها اللي باش تخلّي اقتصادها صحيح وقتِلّي تزيد في الانفتاح التجاري متاعها، ويُظهرلي باش تفاجئ العالمم...ياخي ما في بالهمش اللي نسبة النمو كان العلماء في الاقتصاد يقيسوها بالإنتاج وبالوقت زاده ؟
وهذاك علاش يلزم المشاكل قصيرة المدى ما تطغاش على القضايا الاستراتيجية اللي هي بيدها تاخذ برشا وقت…