من سمع بوبكّر عكاشة في "ميدي شو" لهذا اليوم، يفهم كلّ المعاني الخفيّة والظّاهرة لهذا القول…
الرّاجل مستدعي مدير الصّندوق القطري للتنمية، المؤسّسة التي تكفلت وحدها بكلّ تكاليف مؤتمر الاستثمار في تونس،
والمؤسّسة التي من المنتظر أن تساهم بما قيمته 5 ميليار دينار من جملة نوايا الاستثمار المعلنة …
والمؤسّسة الّتي قامت طيلة السّنوات الثّلاثة الماضية باستثمارات كبيرة جدا في السكن الاجتماعي والفلاحة وضخّت للاقتصاد التونسيّ مبالغ بمليارات الدّولارات …
آش يقلّوا سي بوبكّر عكاشة؟؟؟
- هل أنّ مؤسّستكم تسعى إلى تبييض صورة قطر عند التّونسيّين؟
- هل تعرف أنّ الشّارع السياسي التونسيّ عنده نقد شديد للدور القطري في تونس.
- على كلّ حال مرحبا بيكم آما تونس راهي دولة ذات سيادة !!!!
طبعا الكلام هذا لم يوجّه منه حرفا واحدا لسفير فرنسا منذ أيّام، ولا للمفوض الأروبي اليوم على أساس أنّهم هذوكم معرّسين بينا وكاتبين عقد نكاح شرعيّ حلال محلّل… اللّي عندو تعليق يعلّق ، أنا سأوقف الكرة الأرضيّة ، وأقفز في أوّل ثقب أسود يعترضني …
عندي إحساس أنّو سمير بالطّيّب ما هوش باش يعدّيهالوا، باش يسخن ، وتطلعلوا الشّهامة والوطنية لوذنيه، ويقوم ويوخّر ويقلّك: الله لا يجعل منها الوزارة… بلادي واستقلاليّة قرارنا الوطني قبل كلّ شيء…على جال بلادي إن شاء الله ناكل الشّوك، ولاّ حتّى الظّلف كيما قال خويا إبراهيم هاك العام منين كنّا نناضلوا ضدّ الترويكا… ونعلبوها الكورة، نعلبوها الكورة، نعلبوها الكورة ( خمسة مرّات)
ومبعدما يسخن، يقوم يبلبز المحفل، ويبدا يصيح : شعب تونس شعب حرّ، لا تركيا لا قطر، والجماعة يشدّوا فيه وهو باعث العالم الكلّ يزهّز، ويصيح بأعلى صوتوا : شعب تونس شعب حرّ ، لا هذيكا لا قطر…( يعاودها خمسة مرّات زاده)
يتلفّت وزير فرانسا ويجي باش يقوم ، ياخي يقلّوا : لا … والله ماصارها … أنت خاطي ، أنت مولى الدار… خيركم سابق والعين ما تعلاش على الحاجب !!!
وبعد هذاكا الكلّ، يرمي المفاتح متاع الكرهبة وبونوات الايسونس … فيقوم أمير قطر ويسأله: " بكام كيلو النّضال يا طويل العمر؟"
وبينما هو كذلك… تلتحق به تلك البجعة الجميلة، نفس البجعة اللّي عملت معاه سلفي ذات يوم، فتقول له مرّة أخرى : "وقتاش يا سمير، وقتاش؟؟؟
فيلعن الشيطان اللّي عصى ربّي، ويقول لها :
" والله فكّرتيني … زعمة تخمّرت ونسيت… الصوف يتباع بالرّزانة يا كبدي… بالرّزانة …"
؟ OFF ولاّ ON